Guðný María gefur út jólalag

„Þetta lag eftir mig er samið til barna minna fjögurra þeim Jóhönnu, Gunnari, Arnþóri og Sigríði. Við höfum ekki fengið að halda saman jólin síðan 1997,“ segir Guðný María Arnþórsdóttir sem er tónlistarkona sem hefur gefið út töluvert magn af lögum í gegnu tíðina. Hún birtir lögin aðallega á YouTube-síðu sinni. 

Hún hefur nú gefið út jólalagið Jólapakka en lagið hefur mikla þýðingu fyrir Guðnýju sem hefur ekki alltaf upplifað góð jól.

„Pabbi minn var oftast mjög geðvondur og pirraðir er jólin nálguðust og mamma mín sígrátandi. Það voru ekki jól í þeim pakka. Því spyr ég í þessu lagi, eru jól í þínum pakka?“

Hún segir að jólin 1997 hafi verið yndisleg og vonast til að geta haldið jólin aftur einn daginn.

„Lagið er yfirfullt af ást og jólagleði. Í þakklæti til þeirra og von um jól með þeim að nýju. Því vildi ég skila þakklæti til barna minna fyrir jólin sem ég hef átt með þeim í von um að fá að eignast slíkt aftur síðar.“

Guðný María sá sjálf um undirspil, söng, upptöku, myndbandið, lag og texta.