Hafið gleypti geitina

Tólftu umferð í Vodafonedeildinni í CS:GO lauk er HaFiÐ mætti GOAT. Var kortið Train valið sem heimavöllur af Hafinu og sýndu þeir mikla yfirburði þar. Lokastaðan var HaFiÐ 16 - 3 GOAT.

Hafið hóf leikinn í vörn (Counter-terrorist) og voru fyrstu loturnar í leiknum jafnar. Fljótt varð varnarleikur Hafsins þó GOAT mönnum um of. Liðsmenn Hafsins voru duglegir að sækja sér upplýsingar með pressu á réttum tímum. Og oftar en ekki skilaði pressan þeim fellum sem að tóku bitið úr sóknarleik GOAT.

Liðsmaður Hafsins allee (Alfreð Leó Svansson) hélt vörninni í lás með frábærum töktum á vappanum (AWP - sniper). Til marks um það tókst GOAT einungis að vinna þrjár lotur í leikhluta sem Hafið átti.

Staðan í hálfleik var Hafið 12 - 3 GOAT.

Ölduganginum í Hafinu linnti ekki í seinni hálfleik, en með b0ndi (Páll Sindri Einarsson) og allee (Alfreð Leó Svansson) í fararbroddi gátu GOAT menn enga björg sér veitt. Hafið sótti þær fimm lotur sem þeir þurftu til að klára leikinn og sigruðu á sannfærandi máta.

Lokastaðan Hafið 16 - 3 GOAT.