Messi ætlar ekki að mæta í skimun og æfingar hjá Barcelona

Lionel Messi, einn besti fótboltamaður allra tíma, vill fara frá Barcelona áður en nýtt tímabil hefst, eins og fram hefur komið í fjölmiðlum síðustu daga.

Það nýjasta í málinu er að Messi ætli ekki að mæta í skimun fyrir kórónuveirunni hjá Barcelona og þá mun hann ekki mæta á æfingar með liðinu.

Í samningi Argentínumannsins við Barcelona var ákvæði um að hann hefði getað rift samningi sínum við félagið þann 1. júní sl. og farið á frjálsri sölu. Tímabilið kláraðist hinsvegar ekki fyrr en um miðjan ágúst hjá Messi en hann trúir því að hann eigi rétt á að nýta ákvæðið vegna óhefðbundinna aðstæðna sem gerðu það að verkum að tímabilinu var seinkað í öllum bestu deildum Evrópu. 

Málið er nú í höndum lögfræðinga og lögfræðingar Messi ráðleggja honum einfaldlega að mæta hvorki á æfingar né í Covid-próf þar sem nýtt undirbúningstímabil er hafið og það gæti gert út um vonir Messi að komast frítt frá félaginu. 

Messi hefur spilað fyrir Barcelona í 17 ár og unnið 33 titla með félaginu. Núna virðist liðið hinsvegar komið á endastöð eftir að hafa verið niðurlægt í Meistaradeildinni þrjú ár í röð. Argentínumaðurinn vill því leita á nýjar slóðir en það stefnir í að endir hans hjá Barcelona verði ekki fallegur.