Þrjátíu ár frá óvæntustu úrslitum boxsögunnar

Í dag, 11. febrúar, eru nákvæmlega 30 ár frá einum óvæntustu, ef ekki óvæntustu, úrslitum hnefaleikasögunnar.

Á þessum degi fyrir þremur áratugum rotaði lítt þekktur boxari, Buster Douglas að nafni, ósigraða heimsmeistarann Mike Tyson í Tokyo Dome.

Fáir ef einhverjir höfðu trú á því að Douglas ætti möguleika gegn Tyson sem hafði mikla yfirburði í þungavigtinni á þessum tíma. Og hann var jafnvel talinn besti boxari heims, pund fyrir pund.

Tyson vann fyrstu 37 bardaga sína á ferlinum, þar af 33 með rothöggi. Hann vann tólf af fyrstu 19 bardögum sínum með rothöggi í 1. lotu. Flestir voru búnir að tapa fyrir Tyson áður en þeir stigu inn í hringinn.

Maðurinn með járnhnefann rotaði alla sem á vegi hans urðu og tók sér sjaldnast mikinn tíma í það. Í síðasta bardaga sínum fyrir rimmuna við Douglas rotaði Tyson Carl Williams eftir aðeins 93 sekúndur.

Flestir litu á að bardaginn við Douglas væri létt upphitun fyrir væntanlegan bardaga Tysons við Evander Holyfield sem varð þó ekki að veruleika fyrr en 1996. Líkur Douglas á að vinna voru aðeins 42-1.

Tyson var hins vegar illa fyrirkallaður á meðan Douglas hafði aldrei verið í betra formi á ævinni. Og Douglas ákvað að berjast þrátt fyrir að móðir hans hefði látist 23 dögum fyrir bardagann.

Douglas veiktist daginn fyrir bardagann en það var ekki að sjá á frammistöðu hans gegn heimsmeistaranum sem var ólíkur sjálfum sér.

Þetta var annar titilbardagi Douglas á ferlinum. Þremur árum fyrr tapaði hann fyrir Tony Tucker. Faðir Douglas, fyrrverandi boxarinn William „Dynamite“ Douglas, var svo svekktur með soninn að hann gekk út úr salnum.

Það var ekki bara Tyson sem var óundirbúinn heldur einnig hornamennirnir hans sem gleymdu m.a. að koma með íspoka.

Sögum ber ekki saman hvort þeir hafi fyllt plasthanska eða smokka með klökum til að kæla augað á Tyson sem var orðið bólgið. Klaufalegar aðfarir þeirra gerðu illt verra fyrir Tyson sem átti undir högg að sækja í bardaganum.

Tyson virtist hins vegar hafa bjargað sér fyrir horn þegar hann sló Douglas niður í áttundu lotu. Hann stóð hins vegar upp áður en talningu dómarans, Octavio Meyran, lauk. Hún var umdeild og margir töldu að Meyran hefði byrjað of seint að telja.

Í níundu lotu varðist Douglas árásum Tysons og í þeirri tíundu sló hann heimsmeistarann svo niður. Tyson var álíka hissa og allir í salnum enda var þetta í fyrsta sinn sem hann var sleginn niður á ferlinum.

Tyson komst ekki á fætur áður en talningu Meyrans lauk og því var fyrsta tap hans á ferlinum staðreynd. Douglas hafði tekist hið ómögulega, að vinna sjálfan Mike Tyson.

Ekkert varð af því að þeir Douglas og Tyson mættust aftur. Í næsta bardaga sínum, titilvörninni, tapaði þungur og þreyttur Douglas fyrir Holyfield og lagði hanskana á hilluna eftir það. Hann byrjaði aftur sex árum síðar en náði sér ekki aftur á strik.

Tyson barðist fjórum sinnum í viðbót áður en hann var dæmdur í fangelsi fyrir nauðgun 1991. Tyson náði titlunum sínum aftur eftir að honum var sleppt lausum en tapaði þeim til Holyfields. Hann hætti fyrir fullt og allt 2005.