Sportpakkinn: Bjóða leikmönnum upp á að taka þjálfaranámskeið á Pinatar

Tveir nýliðar eru í leikmannahópi íslenska kvennalandsliðsins í fótbolta fyrir leikina á Pinatar-mótinu í fótbolta á Spáni í byrjun næsta mánaðar. Arnar Björnsson fór yfir hópinn.

Landsliðið tekur ekki þátt í Algarve-mótinu eins og mörg undanfarin ár en spilar í byrjun mars við Norður Írland, Skotland og Úkraínu. Landsliðsþjálfarinn Jón Þór Hauksson er ánægður með mótherjana sem Ísland mætir á Pinatar.

„Þeir henta okkur vel á þessum tímapunkti, allir leikirnir þrír eiga eftir að nýtast okkur. Skotarnir eru með sterkt lið, við spiluðum tvo leiki við þá í fyrra. Skotar eru með öfluga leikmenn og þá má reikna með hörkuleik gegn þeim. Norður Írland og Úkraína eru með lið sem henta okkur í verkefnin í apríl,“ sagði Jón Þór en næstu leikir Íslands í undankeppni EM 2021 eru gegn Slóvakíu og Ungverjalandi í apríl.

Jón Þór segir að tvö síðastnefndu liðin ættu að henta betur heldur en liðin sem Ísland hefur mætt undanfarin ár á Algarve mótinu.

„Við vorum ánægð með marga hluti í leikjum á síðasta ári og viljum halda áfram á þeirri braut. Við viljum þróa okkar leik, hafa boltann aðeins meira, byrja okkar sóknir og byggja þær upp út frá vörn og markmanni. Við viljum einbeita okkur að þessum hlutum í þessu verkefni,“ sagði Jón Þór.

Natasha Anasi hjá Keflavík og Berglind Rós Ágústsdóttir, fyrirliði nýkrýndra Reykjavíkurmeistara Fylkis, hafa ekki verið valdar áður. En hvað hafa þær fram að færa?

„Þetta eru gríðarlega öflugir leikmenn sem hafa staðið sig frábærlega hér heima. Það verður spennandi að sjá til þeirra í þessum leikjum og hvernig þær koma inn í okkar hóp. Þær geta leyst ólík hlutverk,“ sagði Jón Þór.

Margir voru að vonast eftir því að Cloé Lacasse yrði valin í hópinn. Hún skoraði grimmt með ÍBV en gekk síðan til liðs við Benfica í Portúgal og er markahæst í deildinni þar í landi með 20 mörk. Hún fékk íslenskan ríkisborgararétt í fyrra en illa hefur gengið að fá heimild fyrir því að hún spili með landsliðinu.

„Staðan er óbreytt, hún hefur enn ekki fengið keppnisleyfi frá FIFA og þess vegna kemur hún ekki til greina núna. Vonandi skýrist það fljótlega. Við erum að vinna að á fullu þessu innanhúss og hjá FIFA. Vonandi leystist málið sem allra fyrst.“

Landsliðskonurnar gera meira en að spila fótbolta. Í ferðinni verður þeim boðið að taka fyrstu skrefin í átt að þjálfaraferli þegar þær leggja fótboltaskóna á hilluna.

„Þetta er að frumkvæði leikmanna og í ljósi umræðunnar að það eru of fáar konur sem eru að þjálfa. Þarna höfum við í þessum hópi frábæra karaktera, leiðtoga og mikla leikreynslu og þekkingu á leiknum. Fyrir okkur hjá KSÍ þá er það frábært að við getum boðið uppá þetta. Það er mikill áhugi hjá leikmönnum að hefja þetta nám og því gleðitíðindi fyrir knattspyrnuna,“ sagði Jón Þór.

Skagamaðurinn er ánægður með stöðuna á íslenska hópnum þótt vissulega spili það inn í að margir leikmenn séu enn á undirbúningstímabili.

„Leikformið mætti vera betra hjá sumum leikmönnum en er bjartsýnn fyrir komandi verkefni,“ sagði Jón Þór.

Fréttina í heild sinni má sjá hér fyrir neðan.