Segir myndina hafa verið óþarfa: „Við hefðum ekki átt að taka hana“

Þórdís Kolbrún Reykfjörð Gylfadóttir, ferðamála-, iðnaðar- og nýsköpunarráðherra, segist hafa talið að sér og vinkonum sínum væri heimilt að sitja við sama borð og vera innan við tvo metra hvor frá annarri þegar þær eyddu síðastliðnum laugardegi saman. Hún segir að það hafi verið mistök af hálfu hópsins að stilla sér upp fyrir mynd sem í kjölfarið fór í mikla dreifingu á netinu.

Mikið hefur verið rætt og ritað um hitting vinkvennanna og einhver telja að með athæfi sínu hafi Þórdís Kolbrún gerst brotleg við reglugerð byggða á sóttvarnalögum. Í viðtali við Ríkissjónvarpið í kvöld sagði hún mikilvægt að reglur um fjarlægðar- og samkomutakmarkanir væru skýrar, sem og markmið reglnanna.

„Við vorum auðvitað mjög meðvitaðar um reglurnar og þegar við gengum inn á þennan veitingastað var ég meðvituð um að það væri tryggð tveggja metra regla í kring um okkar borð en taldi okkur heimilt að sitja saman við þetta borð. Það er í samræmi við þessa auglýsingu [auglýsingu sóttvarnalæknis] og ég held að það skipti bara máli að þetta sé skýrt. Umræðan fór auðvitað á flug um þetta mál í gær og olli misskilningi, þannig að það skiptir máli að reglurnar séu skýrar og markmiðið með þeim skýrt sömuleiðis.“

Þórólfur Guðnason sóttvarnalæknir sagðist á upplýsingafundi Almannavarna og Landlæknis í dag ekki telja að Þórdís og vinkvennahópurinn hefði gerst brotlegur við sóttvarnalög, þar sem auglýsing yfirvalda um sóttvarnareglur segðu ekki til um að tveir einstaklingar sem ekki deildu sama heimili þyrftu að viðhalda tveggja metra fjarlægð heldur þyrftu rekstraraðilar að tryggja að fólk gæti fengið sína tvo metra.

Skilur hvernig málið kom við fólk

„Ég skil vel hvernig þetta kom við fólk. Þessi myndataka af okkur saman í einum hópi, þrátt fyrir að strangt til tekið skiljist mér að það sé ekki brot á einhverjum reglum, var hún óþarfi og við hefðum ekki átt að taka hana. Mér þykir það leitt. Ég átta mig á því að ég er í framlínu og fronti og þetta er risastórt verkefni og okkur líður öllum allskonar,“ sagði Þórdís Kolbrún.

Hún sagðist þá geta fullvissað fólk um að hún væri að gera sitt besta í þessum málum og hún muni áfram segja að einstaklingsbundnar sóttvarnir séu helsta vopn þjóðarinnar í baráttunni við kórónuveirufaraldurinn, enda sé það hennar trú að svo sé.

Ég sjálf fylgi því eftir eftir bestu getu.

Aðspurð hvort fólk sem hefur hingað til haldið meira en tveggja metra fjarlægð frá öllum sem það deilir ekki heimili með sé að misskilja reglur sóttvarnayfirvalda segir Þórdís að almenna reglan kveði á um tveggja metra fjarlægð.

„Eins og kemur fram í auglýsingu, almenna reglan er tveggja metra regla, við eigum að sýna fólki kurteisi og viðhalda tveggja metra reglu. Það er þá skylda rekstraraðila að fólk geti komið inn á veitingastað og viðhaldið þessari tveggja metra reglu. Að öðru leyti finnst mér þríeykið hafa svarað þessu ágætlega í dag. Eins og ég segi, ég tek þetta til mín og vanda mig en ég taldi mig að sjálfsögðu vera að fylgja reglum.“

Myndi ekki halda 100 manna fermingu

Í ljósi þeirra samkomutakmarkana sem nú eru í gildi hafa rekstraraðilar sem og aðrir þurft að fresta eða aflýsa ýmsum viðburðum. Þar má nefna tónleika og skemmtanir, en einnig persónulegri viðburði eins og útskriftar- og fermingarveislur, auk jarðarfara. Þórdís Kolbrún segir stórt verkefni að finna út úr því hvernig samfélagið tekst á við faraldurinn.

„Eins og áður hefur verið sagt: Þetta eru einstaklingsbundnar ákvarðanir og ég myndi sjálf ekki halda hundrað manna fermingarveislu en það er líka bara stórt verkefni að finna út úr því hvernig við gerum þetta saman. Eins og ég segi, ég átta mig á mínu hlutverki í því en veitingastaðir eru opnir og við höfum fylgst með því hvernig lögreglan meira að segja er að fara yfir það hvernig rekstur er innan þeirra. Það að hópar sitji saman, litlir, inni á veitingastað hefur að mér skilst verið samkvæmt reglunum,“ sagði Þórdís Kolbrún og bætti við að vinkvennahópurinn og starfsfólk veitingahússins hafi farið að öllu með gát.

Saknaði vinkvenna af Skaganum

Eins og fjallað hefur verið um sagðist Þórdís Kolbrún í Facebook-færslu vegna málsins hafa átt langþráðan frídag með æskuvinkonum sínum. Aðspurð hvort hún héldi ekki að öll þjóðin væri orðin langeygð eftir fríi frá veirunni sagðist hún ekki hafa meint að hún hafi þurft á frídeginum að halda sem slíkum.

„Ég nefndi sérstaklega að ég hefði átt langþráðan dag með vinkonum mínum, vegna þess að þetta eru æskuvinkonur mínar sem ég hitti ekki oft, við búum í mismunandi bæjarfélögum og lifum okkar lífi. Við erum búin að fara í gegnum sumarfrí og vonandi hafa flestir átt ágæta daga en ég veit líka að við erum öll í mjög mismunandi stöðu. Það er ekki þannig að ég hafi svo ofboðslega þurft á þessu fríi að halda, heldur meira bara að ég saknaði vinkvenna minna af Skaganum,“ sagði Þórdís Kolbrún.