Man. City talið leiða kapphlaupið um Messi

Það vakti mikla athygli í gær þegar fréttir bárust af því að Lionel Messi, stórstjarna Barcelona, vildi komast í burtu frá félaginu.

Messi ku vera búinn að fá nóg af ruglinu sem hefur verið í gangi hjá Barcelona. Þjálfaraskipti, samfélagsmiðlaskandall og margt fleira.

Ekki skánaði ástandið er Barcelona tapaði 8-2 á föstudagskvöldið fyrir Bayern Munchen. Algjör niðurlæging.

Esporte Interativo greinir frá því að Manchester City leiði kapphlaupið um Messi sem kemur ekki mikið á óvart.

Þegar Argentínumaður hefur verið orðaður burt frá Barcelona þá hefur Man. City oftast verið nefnt í því samhengi.

Messi og Pep Guardiola, stjóri Man. City, unnu auðvitað saman hjá Barcelona og það er einnig spurning hvort Messi vilji prufa sig af í ensku úrvalsdeildinni.

Barcelona er þjálfaralaust eftir að Quique Setien fékk sparkið. Forseti Barcelona staðfesti þetta í gærkvöldi.