HÉR ER frábær viðbót við Smáralind

„Við stefnum að því að það komi nýtt og ferskt efni inn á HÉR ER daglega og alltaf eitthvað spennandi til að gleyma sér yfir. Viðtökurnar hafa verið framar öllum vonum og er greinilega merki um að áhugi fyrir svona vef er mikill, enda eru Íslendingar miklir tísku-og hönnunaraðdáendur,“ segir Helga Kristjáns en hún ritstýrir glænýjum tísku- og lífsstílsvef Smáralindar, HÉR ER, sem fór í loftið þann 11. júní síðastliðinn.

Tískuheimurinn dægrastytting af bestu gerð

Helga er þrautreyndur tískublaðamaður, stílisti og förðunarfræðingur og vann sem blaðamaður hjá Vikunni og Nýju lífi um árabil og sem förðunarritstjóri Nýs lífs og íslenska Glamour. Hún hefur einnig komið að förðun og stíliseringu fyrir forsíður stærstu tímarita landsins og ritstýrt tískublaði Mannlífs.

„Ég var ekki há í loftinu þegar mig dreymdi um að verða ritstjóri tískutímarits en tískuheimurinn í heild sinni hefur alltaf verið minn „flótti“ frá lífsins raunum eða grámyglu, dægrastytting af bestu gerð,“ segir Helga sem segist einnig hafa brennandi ástríðu fyrir því að ráðleggja konum varðandi snyrtivöru- og fatakaup.

„Fyrir tuttugu árum, þegar ég var nítján ára, vann ég í fjölskylduversluninni GAP sem var einmitt í Smáralind og þá var Style.com, tísku- og lífsstílsvefur Vogue sá vefur sem ég heimsótti daglega. Í þá gömlu, góðu var ekki mikið af slíku efni í boði á Netinu á íslensku. Þá kviknaði fyrst upp sú hugmynd hjá mér að því að opna tískuvef en hún varð aldrei mikið meira en bara hugmynd á blaði. Ég gæti því ekki verið glaðari og þakklátari fyrir að æskudraumur minn sé að rætast- einmitt með þessum hæfileikabombum sem ég vinn með,“ segir Helga en hugmyndin að vef sem sýndi það nýjasta úr verslunum Smáralindar og væri einnig ráðleggjandi og til dægrastyttingar hafði lengi verið í kortunum hjá markaðsdeildinni þegar Helga tók við samfélagsmiðlum þeirra fyrir rúmu ári.

„Þar kom bakgrunnur minn sterkur inn. Ætli ég hafi ekki verið púslið sem vantaði upp á,“ segir Helga og brosir. „Við erum allavega svakalega gott teymi í markaðsdeild Smáralindar og erum gríðarlega stoltar af útkomunni.“

Smáralind hefur einnig getið sér gott orð fyrir samfélagsmiðlaefni en fyrirtækið vann Lúður, íslensku auglýsingaverðlaunin, í ár fyrir samfélagsmiðla ársins og því margt til að kætast yfir á þeirra bæ.

Heiðarleiki í skrifum

„HÉRER.IS er hugsaður til dægrastyttingar en líka til að kynna sér nýjasta nýtt og fá ráðleggingar varðandi hitt og þetta. Heiðarleiki í skrifum skiptir okkur miklu máli og við munum kappkosta við að mæla ekki með neinu sem við getum ekki staðið við,“ útskýrir Helga.

Vefnum er skipt upp í fimm flokka; tíska, lífsstíll, fegurð, heimili og hönnun og fjölskyldan. Fjallað verður um allt sem tengist þessum flokkum á einn eða annan hátt, þó tískutengt efni verði mest áberandi.

„Við viljum gefa góð ráð, mæla með bestu vörunum, sýna það sem er í verslunum hverju sinni og kynna nýjustu trendin. Eins munu viðtöl rata þar inn og stefnan er að fá gestapenna með ólíkar áherslur til að skrifa fyrir okkur reglulega. Edda Hermannsdóttir er í stóru viðtali á vefnum okkar núna og við vonumst eftir að fá flottar fyrirmyndir í viðtöl til framtíðar,“ segir Helga að lokum og hvetur fólk til að smella á HÉRER.IS.