Framkvæmdastjórn Evrópusambandsins segir að heimsfaraldur nýju kórónuveirunnar muni valda mesta efnahagssamdrætti sem hafi átt sér stað frá stofnun sambandsins. Búist er við að hann verði 7,7 prósent á þessu ári, sem er mun meiri samdráttur en átti sér stað árið 2009. Þá var 4,5 prósenta samdráttur og tíu prósenta atvinnuleysi.
Í vorspá framkvæmdastjórnarinnar segir að atvinnuleysi gæti hækkað í níu prósent á árinu.
Hagkerfi ESB gæti jafnað sig strax á næsta ári, eftir því hvernig faraldurinn fer á næstu mánuðum, en framkvæmdastjórnin segir að bataferlið verði mismunandi á milli aðildarríkja. Það velti á því hvaða ríki geti leyft sér að draga úr félagsforðun fyrr en önnur og grunnstoðum viðkomandi hagkerfa.
Paolo Gentiloni, efnahagsstjóri framkvæmdastjórnarinnar, segir í tilkynningu að það að önnur ríki muni líklega jafna sig fyrr en önnur geti ógnað Evrópusambandinu sjálfu. Það væri hins vegar hægt að koma í veg fyrir slíka ógn með sameiginlegum efnahagslegum aðgerðum.
Í frétt Bloomberg er vísað til ríkja eins og Grikklands, Ítalíu og Spánar og sagt að ástandið gæti komið hvað verst niður á þeim. Ítalía og Spánn hafa þegar orðið fyrir verulegum skaða og manntjóni vegna faraldursins. Þar að auki treysta þau verulega á ferðaþjónustu en þar er búist við því að sá iðnaður verði lengur að jafna sig en aðrir.
Miklar deilur hafa þegar átt sér stað meðal aðildarríkja ESB varðandi sameiginlegar efnahagsaðgerðir. Að mestu snúa deilurnar um það hvort neyðaraðstoð eigi að vera í formi lána eða styrkja. Ríkari ríki Evrópu hafa sett sig á móti því að aðstoðin verði í formi styrkja og hafa Þjóðverjar og Hollendingar verið í forsvari fyrir þann hóp.