Gert ráð fyrir ríflega 100 milljóna lakari afkomu en eftir aðra umræðu

Nú stendur yfir á Alþingi þriðja umræða um fjárlög ársins 2019. Willum Þór Þórsson, formaður fjárlaganefndar, gerði grein fyrir nefndaráliti meirihluta nefndarinnar við upphaf umræðunnar en þar segir að þær breytingatillögur sem komið hafa fram milli umræðna séu að mestu leyti tæknilegs eðlis. Tvær breytingatillögur séu þó gerðar sem hafa áhrif á afkomuna, samtals að fjárhæð 102,6 milljónir króna, sem leiða til lakari afkomu en miðað var við eftir aðra umræðu.

Sjá einnig: Gert ráð fyrir halla á fjárlögum í fyrsta skipti í sjö ár

Annars vegar er um að ræða aukin framlög vegna verðlagsbóta á viðbótarsamningi milli ríkis og kirkju upp á tæpar 83 milljónir. Hins vegar að veitt verði 20 milljón króna tímabundið framlag til stofnunar Vigdísar Finnbogadóttur í erlendum tungumálum, að því er segir í meirihlutaáliti fjárlaganefndar.

Telur ekki þörf á hækkun til skattaeftirlits

„Meirihlutinn vekur athygli á því að hann telur ekki þörf á að leggja til frekari hækkun á framlögum til þeirra aðila sem vinna við að tryggja virkt skatteftirlit að sinni. Í frumvarpinu er nú þegar gert ráð fyrir 200 milljón króna hækkun til embættis ríkisskattstjóra vegna aukins skatteftirlits sem útfært verður með því að styrkja bæði eftirlitssvið, greiningarteymi og tekjuskráningareftirlit hjá embættinu,“ segir meðal annars í nefndarálitinu.

Vísað er einnig til aðgerða sem stjórnvöld kynntu um miðjan nóvember sem snúi meðal annars að hertri löggjöf um skattundanskot og fjölgun upplýsingaskiptasamninga við önnur ríki. Bjarni Benediktsson, fjármála- og efnahagsráðherra, var á Alþingi í gær sakaður um að brjóta lög um opinber fjármál með því að ætla að veita auknu fjármagni til eftirlitsstofnanna vegna Samherjamálsins. Það aukfjármagn muni koma úr sérstökum sjóðum en ekki í gegnum fjárlög.

Sjá einnig: Bjarni rauk af þingfundi í fússi

Í nefndarálitinu segir einnig að árinu 2017 hafa framlög til ríkisskattstjóra verið aukin að raungildi um tæp 14%. „Að auki er vakin athygli á því að varasjóður málaflokksins hljóðar upp á 77,4 millj. kr. á næsta ári og er hægt að nota hann til þess að efla skatteftirlit enn meira ef þörf krefur. Þá skal þess getið að almennur varasjóður þessa árs hefur ekki verið fullnýttur enn sem komið er og því svigrúm til að bregðast við útgjaldatilefnum innan ársins í ár,“ segir í nefndaráliti meirihluta fjárlaganefndar.