125 milljarðar á einni mínútu

Sala hjá kínverska netverslunarrisanum Alibaba hefur verið með besta móti á hinum árlega „singles day“, eða degi einhleypra, sem ber upp í dag. Samkvæmt tölum frá risanum keyptu neytendur vörur fyrir einn milljarð Bandaríkjadala, eða 125 milljarða íslenskra króna, á fyrstu mínútu útsölunnar.

Dagur einhleypra er hugarfóstur téðs Alibaba og er ætlað að koma til móts við hinn rótgróna Valentínusardag. Dagurinn hverfist þó einkum um netverslun og er orðinn sá umfangsmesti sinnar tegundar í heiminum.

Þannig hafði Alibaba selt vörur fyrir fjórtán milljarða Bandaríkjadala þegar klukkutími var liðinn af útsölunni, eða um 1755 milljarða íslenskra króna.