Einn látinn og níu særðir eftir sverða­á­rás í finnskri verslunar­mið­stöð

Einn er látinn og níu manns hafa verið fluttir á sjúkrahús eftir árás í starfsmenntamiðstöð í verslunarmiðstöð í finnska bænum Kuopio í morgun. Finnskir fjölmiðlar segja að óþekktur maður hafi þar ruðst inn í bekkjarstofu vopnaður sverði.

Lögregla greinir frá því á Twitter að lögreglumenn hafi skotið úr byssum eftir að komið var á vettvang. Einn hefur verið handtekinn vegna málsins og hefur lögregla girt af svæðið í kringum miðstöðina. 

Árásin átti sér stað í Savolax-starfsmenntamiðstöðinni í verslunarmiðstöðinni Herman. Er hana að finna um fjórum kílómetrum suður af miðborg Kuopio. Hinir slösuðu hafa verið fluttir á háskólasjúkrahúsið í borginni.

Tilkynning barst lögreglu um árásina 12.50 að staðartíma, eða 9:50 að íslenskum tíma.

Kuopio er að finna um 350 kílómetrum norður af Helsinki, höfuðborg Finnlands.