Helgi: Langar að koma liðinu í efstu röð aftur

Helgi Sigurðsson var í dag ráðinn sem þjálfari karlaliðs ÍBV í fótbolta. Helgi skrifaði undir þriggja ára samning við ÍBV.

Helgi þjálfaði Fylki síðustu þrjú ár en hætti með liðið eftir tímabilið.

„Ég tel þetta vera gríðarlega spennandi verkefni, frábært að koma hingað í Eyjar,“ sagði Helgi eftir undirskriftina í dag.

„Mig langar að koma liðinu í fremstu röð aftur.“

ÍBV féll í Inkassodeildina í haust og þekkir Helgi það vel að koma liði aftur upp í efstu deild, því Fylkir var líka nýfallinn niður í Inkassodeildina þegar hann tók við þar.