Dómarabréf til stuðnings Huffman varpa nýju ljósi á illdeilur Aðþrengdu eiginkvennanna

Bandaríska leikkonan Eva Longoria, sem þekktust er fyrir leik sinn í sjónvarpsþáttunum Aðþrengdum eiginkonum (e. Desperate Housewives), segir Felicity Huffman, meðleikkonu sína í þáttunum, hafa tekið upp hanskann fyrir sig á tökustað þáttanna, þar sem eineltisseggur úr leikaraliðinu hafi ráðið ríkjum.

Þetta kom fram í bréfi sem Longoria sendi dómara til stuðnings Huffman í máli sem hverfist um svokallaða „háskólasvikamyllu“. Huffman játaði sig seka í maí síðastliðnum fyrir að hafa greitt fimmtán þúsund Bandaríkjadali til að láta leiðrétta á laun svör dóttur sinnar á inntökuprófi í virtan bandarískan háskóla. Gert er ráð fyrir að refsing Huffman verði ákveðin fangelsisvist í einn mánuð og að dómur verði kveðinn upp á föstudag.

Sjá einnig: Dr. Dre dregur færslu um dóttur sína til baka eftir að upp komst um milljarðastyrki

Longoria lýsir Huffman sem góðri vinkonu sinni í bréfinu til dómarans og segir þá fyrrnefndu hafa tekið sér opnum örmum strax á fyrsta degi á tökustað Aðþrengdra eiginkvenna árið 2004.

Þá lýsir Longoria því í bréfinu að samstarfsmaður hennar í þáttunum hafi lagt sig í einelti. Longoria nafngreinir ekki eineltissegginn en fjölmiðlar vestanhafs hafa sett málið í samhengi við þráláta orðróma um illindi milli aðalleikkonu þáttanna, Teri Hatcher, og annarra í leikaraliðinu.

Longoria segir að hún hafi liðið „vítiskvalir“ í hvert sinn sem hún neyddist til að vinna með umræddum samstarfsfélaga. Eineltið hafi viðgengist þangað til að Huffman sveif á viðkomandi og krafðist þess að látið yrði af hegðuninni.

Þá þakkaði Longoria Huffman fyrir að hafa lagt til að Aðþrengdu eiginkonurnar tækju sig saman sem hópur í kjaraviðræðum við framleiðendur. Fram að því hafði Longoria fengið lægri laun en meðleikkonur sínar.

Hélt áfram að heilsa vandræðagemsanum hlýlega

Marc Cherry, höfundur Aðþrengdra eiginkvenna, er einnig skrifaður fyrir stuðningsbréfi til höfuðs Huffman. Í bréfi sínu lýsir hann sambærilegum vandræðum á tökustað vegna hegðunar tiltekinnar leikkonu.

„Hún var stórstjarna sem glímdi við alvarleg hegðunarvandamál,“ skrifar Cherry. Við tökur á sjöundu þáttaröðinni hafi umrædd leikkona neitað alfarið að eiga í samskiptum við meðleikara sína nema í gegnum framleiðendur þáttanna. Huffman hafi haldið áfram að vera kurteisin uppmáluð í samskiptum við konuna og heilsað henni hlýlega á hverjum morgni, þrátt fyrir að eiga ekki von á svari.

Að minnsta kosti fimmtíu manns hafa verið ákærðir í tengslum við sviksamlegar skráningar á nemendum í háskólum á borð við Yale, Georgetown, Stanford og UCLA. Í ákærunum er því haldið fram að svikamyllunni hafi verið ætlað að hjálpa auðugum Bandaríkjamönnum að greiða fyrir því að börnin þeirra kæmust inn í bestu skólana.

Foreldrarnir, sem allir eru efnaðir, eru sakaðir um að hafa beitt ýmist mútum eða svikum til að tryggja börnunum sínum inngöngu. Bandaríska leikkonan Lori Loughlin og eiginmaður hennar og tískuhönnuður Mossimo Giannulli, sem einnig eru ákærð í málinu, hafa neitað sök.