United gæti selt Fred fyrir miklu lægri upphæð en félagið keypti hann á

Manchester United gæti selt brasilíska miðjumanninn Fred til Fiorentina áður en félagaskiptaglugganum í Evrópu verður lokað 2. september næstkomandi.

Samkvæmt La Nazione er United tilbúið að selja Fred fyrir rúmar 27 milljónir punda. United keypti Brassann frá Shakhtar Donetsk á 52 milljónir punda fyrir síðasta tímabil.

Fred hefur ekki verið í leikmannahópi United í fyrstu þremur leikjum liðsins í ensku úrvalsdeildinni á tímabilinu.

Hann byrjaði aðeins 13 leiki í ensku úrvalsdeildinni á síðasta tímabili. Fred hefur alls leikið 25 leiki fyrir United og skorað eitt mark.

Fiorentina tapaði fyrir Napoli, 3-4, í fyrsta leik sínum í ítölsku úrvalsdeildinni á laugardaginn.