Rigning í kortunum um nánast allt land

Í nótt og fyrripart dags á morgun má búast við lélegu skyggni í súld og rigningu sunnan og vestan lands með lægð sem nálgast nú landið suðvestanvert.

Blika frá skilunum er farin að sjást sunnan og vestan til en sólin ætti þó ná að skína vel í gegnum hana fram eftir degi í dag að því er segir í hugleiðingum veðurfræðings á Veðurstofu Íslands.

Þegar líður á morgundaginn þokast svo skil lægðarinnar yfir norðausturhluta landsins. Það mun því þykkna upp á þeim slóðum með tilheyrandi vætu en á móti draga úr úrkomu sunnan og vestan til.

Úrkomusvæðið er svo reyndar ekkert að flýta sér frá landinu svo á fimmtudaginn má búast við vætu í öllum landshlutum.

Fram eftir degi í dag þurfa ferðalangar austast á landinu að hafa í huga að þar er nú allhvöss norðvestanátt.

Við fjöll á þeim slóðum við vindhviðum sem geta verið varhugaverðar fyrir húsbíla og önnur farartæki sem taka á sig mikinn vind. Eftir hádegi dregur svo smám saman úr vindi og léttir til norðaustan lands með kvöldinu.

Veðurhorfur á landinu:

Fremur hæg norðlæg átt um landið vestanvert, en 8-15 m/s austan til á landinu, hvassast við austurströndina. Víða bjart veður, en skýjað og dálítil væta norðaustan til. Dregur smám saman úr vindi og úrkomu þegar líður á daginn, en þykknar upp suðvestan til og fer að rigna seint í kvöld, en léttir til norðaustan til.

Suðaustan 5-13 og rigning og súld sunnan- og vestan lands seint í nótt og á morgun, en hægari breytileg átt og lengst af bjart norðaustan til.

Snýst í hægari suðvestanátt með smá skúrum sunnan- og vestan lands þegar líður á daginn, en dálítil rigning norðan- og austanlands seint á morgun. Hiti 10 til 18 stig að deginum hlýjast suðaustan til, en svalara norðaustanlands í dag.

Á miðvikudag:

Suðaustlæg átt 5-13 og rigning um sunnan- og vestanvert landið, en dregur úr vindi og úrkomu eftir hádegi. Fremur hæg norðlæg átt norðan- og austanlands og lengst af þurrt. Hiti yfirleitt 10 til 16 stig.

Á fimmtudag:

Norðaustan 5-13 m/s og víða dálítil væta. Styttir upp sunnan- og vestanlands um hádegi og léttir síðan heldur til. Dregur úr úrkomu norðan- og austanlands um kvöldið. Hiti 7 til 15 stig, hlýjast suðvestanlands.

Á föstudag:

Norðlæg eða breytileg átt 5-10 m/s. Skýjað en úrkomulítið norðan- og austanlands og hiti 5 til 10 stig, en annars skýjað með köflum, víða síðdegisskúrir og hiti 10 til 17 stig.

Á laugardag:

Útlit fyrir norðlæga átt með vætu fyrir norðan, en bjart að mestu sunnan heiða. Hiti breytist lítið.

Á sunnudag og mánudag:

Líkur á norðaustan átt, skýjað með köflum og úrkomulítið og heldur hlýnandi veður.