Grænlendinga dreymir enn um olíuævintýri

Grænlensk stjórnvöld hafa kynnt nýja fimm ára áætlun um olíuleit. Með henni er lýst þeirri stefnumörkun að Grænland verði olíuframleiðsluland í framtíðinni. 

Í formála 44 síðna greinargerðar er vísað til þess að Jarðfræðistofnun Bandaríkjanna hafi árið 2007 áætlað að einhverjar mestu óuppgötvuðu olíulindir jarðar væru á Grænlandi og metið þær yfir 30 milljarða tunna af olíu.

Rifjað er upp að olíuleit hafi verið stunduð á Grænlandi frá árunum upp úr 1970. Til þessa hafa sex holur verið boraðar á landgrunni Grænlands en þær hafa aðeins skilað örlitlum votti af olíu. 

Fram kemur að tuttugu leitarleyfi hafi verið í gildi á tímabilinu 2014-2018 en þeim hafi öllum verið skilað inn. Síðan þá hafi borist fjórar umsóknir, sem veki bjartsýni.

Langtímamarkmiðið séu boranir í landgrunni Grænlands, þar sem stærstu tækifærin séu, en fyrst um sinn verði áhersla lögð á boranir á landi, til að endurvekja áhuga olíufélaga. Þar er einkum horft til Norðaustur-Grænlands. 

Minnt er á að í Noregi hafi 33 holur verið boraðar án árangurs á sjöunda áratugnum þar til olía fannst loksins í vinnanlegu magni á Ekofisk-svæðinu í Norðursjó árið 1969. 

„Enginn vafi leikur á því kolvetnissvæði gætu stuðlað að því að Grænland verði efnahagslega sjálfbært, ef Grænlandi tekst að verða olíuframleiðsluland,“ segir í rökstuðningi grænlensku landsstjórnarinnar.

„Við lifum á tímum þegar mikilvægt er að leggja áherslu á aðra orkugjafa og draga úr losun koltvísýrings. Það er þó ljóst að það mun einnig verða aukin eftirspurn eftir olíu á næstu árum. Þannig hefur Alþjóðaorkustofnunin áætlað að eftirspurn eftir olíu muni aukast fram til ársins 2040. 

Grænland, eins og iðnríki og olíuframleiðslulönd, á rétt á að mæta þessari eftirspurn. Þetta breytir ekki því að landsstjórn Grænlands, Naalakkersuisut, leggur á sama tíma mikla áherslu á mikilvægi sjálfbærrar þróunar og annarra orkugjafa,“ segir ennfremur. 

„Þróunin á Grænlandi verður auðvitað að vera sjálfbær. Þetta verður að gera með virðingu fyrir umhverfi okkar og náttúru. En ef við höldum áfram að uppfylla ströngustu staðla á svæðinu, þá verður einnig hægt að samræma markmið um sjálfbæra þróun - bæði staðbundið og á heimsvísu – því að olíu- og gasvinnsla þróist á Grænlandi,“ segir í greinargerð um olíustefnu Grænlands.