Hiti gæti náð 22 stigum um helgina

Þess má vænta að hiti nái allt að 22 stigum austanlands á morgun ef marka má spá Veðurstofunnar. Einnig er spáð 8 til 18 stigum víðast hvar á landinu í dag, með breytilegri vindátt. Hlýjast verður á Suðurlandi.

Þurrt og bjart verður í vesturhluta landsins í dag, en annars skýjað með köflum og stöku skúrir, einkum inn til landsins.

Á Norðurlandi verður hiti 6 til 14 stig í dag, en á Norðurlandi eystra getur hann náð allt að 20 stigum á morgun.

Í hugleiðingum veðurfræðings kemur fram að búast megi við hægri norðlægri átt í dag, skýjað með köflum og stöku skúrir, en þurrt og bjart verði suðvestan- og vestan til á landinu.

Síðar í kvöld mun þykkna upp um vestanvert landið með lítils háttar vætu af og til. Áfram verður þurrt og bjart á Austurlandi.