FH-ingar borguðu umboðsmönnum næstum því þrjár milljónir

FH er það íslenska félag sem þurfti að borga umboðsmönnum mestan pening á tímabilinu 1. apríl 2018 til 31. mars 2019.  

Knattspyrnusamband Íslands hefur birt á heimasíðu sinni árlega skýrslu um umboðsmenn og greiðslur til þeirra.

Í samræmi við reglugerð FIFA um milliliði (FIFA Regulations on Working with Intermediaries) birtir KSÍ eftir lok marsmánaðar á hverju almanaksári opinberlega á heimasíðu sinni, nöfn allra umboðsmanna sem skráðir eru ásamt yfirliti yfir gerninga sem þeir hafa komið að.

Enn fremur birtir KSÍ heildarupphæð allra þóknana eða greiðslna sem raunverulega hafa verið inntar af hendi til umboðsmanna af hálfu skráðra leikmanna og af hálfu hvers félags sem þeir tengjast.

Tölurnar sem eru birtar er samanlögð heildarupphæð fyrir alla leikmenn og samanlögð heildarupphæð hvers félags. Hér eru birtar upplýsingar vegna tímabilsins 1. apríl 2018 til 31. mars 2019.  

Umboðsmenn fengu rúmlega sex og hálfa milljón frá íslenskum félögum en tvö félög eiga um 75 prósent af þeirri upphæð. Það eru félögin FH og Valur. Samtals eru greiðslur til umboðsmanna 6.559.013 í íslenskum krónum.

Ekkert félag borgaði meira en FH sem greiddi umboðsmönnum 2.958.593 krónur á þessum tíma en Valsmenn borguðu umboðsmönnum 2.281.582 krónur.

Nokkra athygli vekur að Eyjamenn borguðu umboðsmönnum ekki eina krónu samkvæmt þessari samantekt þrátt fyrir að vera með marga erlenda leikmenn í sínu liði.

Þær upphæðir sem eru hér fyrir neðan eru greiddar vegna þjónustu umboðsmanna vegna samningsgerðar leikmanns við félag eða félags við leikmann og/eða samningsgerðar um félagaskipti á tímabilinu 1. apríl 2018 til 31. mars 2019.

Greiðslur íslenskra félaga til umboðsmanna:

1. FH 2.958.593

2. Valur 2.281.582

3. Víkingur Ó. 478.328

4. KR 372.000

5. ÍA 271.180

6. Grindavík 135.590

7. Fram 61.740