Þegnarnir á Selfossi reyna að gera uppreisn gegn kóngunum á Ásvöllum

Úrslitarimman um Íslandsmeistaratitilinn í Olís-deild karla í handbolta hefst í kvöld þegar að deildarmeistarar Hauka taka á móti Selfyssingum í Schenker-höllinni að Ásvöllum klukkan 18.30 en útsending hefst á Stöð 2 Sport klukkan 17.45.

Það má svo sannarlega segja að þarna mæta konungar íslenska handboltans á þessari öld þegnum sínum en Haukar hafa sett ný viðmið í íslenska boltanum síðan að þeir unnu sinn annan Íslandsmeistaratitil árið 2000 og þann fyrsta í nútíma handbolta.

Haukar urðu Íslandsmeistarar árið 1943 og spiluðu til úrslita árið 1994 en töpuðu þá fyrir ótrúlegu liði Vals með Ólaf Stefánsson og Dag Sigurðsson á uppleið en það Valslið jafnaði met Víkinga frá níunda áratug síðustu aldar og vann fjögur ár í röð.

Eftir að aldamótin gengu í garð án mikilla tölvuvandræða eins og búist var við tóku Haukar yfir íslenska boltann og unnu sinn annan Íslandsmeistaratitil árið 2000 með því að leggja Fram, 3-1, í úrslitarimmunni.

Drottnun Haukanna

Haukar spiluðu til úrslita árlega frá 2000-2005 og unnu Íslandsmeistaratitilinn fimm sinnum á sex árum, þar af þrisvar í röð frá 2002-2005. Á sama tíma náði liðið ótrúlegum árangri í Meistaradeild Evrópu en drottnun liðsins varð meðal annars til þess að úrslitakeppnin var lögð af frá 2006-2008.

Eftir tvö mögur ár urðu Haukar meistarar eftir venjulega deildarkeppni árið 2008 og tóku svo Valsmenn tvö ár í röð í úrslitakeppninni 2009 og 2010 og unnu aftur þrjú ár í röð. Íslandsmeistaratitlarnir orðnir átta á ellefu árum.

Haukar þurftu svo bíða í fjögur ár eftir næsta Íslandsmeistaratitli en unnu deildarmeistaratitilinn þrisvar sinnum á þeim árum og töpuðu tvívegis í lokaúrslitunum. Það var svo 2015 sem liðið sópaði úrslitakeppninni og vann sinn ellefta Íslandsmeistaratitil árið 2016 eftir að verða deildarmeistari í tólfta sinn.

Öldin í hnotskurn hjá Haukum eru því tíu Íslandsmeistaratitlar og ellefu deildarmeistaratitlar auk þess sem liðið hefur spilað tólf sinnum til úrslita. Öldin hefur verið Haukanna.

Glugginn að lokast hratt

Selfyssingar eru svo sannarlega litla liðið í einvíginu í sögulegu samhengi en liðið hefur aðeins einu sinni leikið um Íslandsmeistaratitilinn. Það var í fyrstu úrslitakeppninni undir núverandi fyrirkomulagi sem spiluð var árið 1992. Selfoss snýr nú aftur í lokaúrslitin í 25. úrslitakeppninni, 27 árum síðar, en liðið hefur aldrei í sögunni unnið svo mikið sem einn stóran bikar.

Selfoss mætti þá öðrum deildarmeisturum frá Hafnarfirði, FH. Selfoss var með frábært lið en það fékk til sín Sigga Sveins til að bæta ofan á frábæra heimamenn eins og Einar Gunnar Sigurðsson, Einar Guðmundsson, Gústaf og Sigurjón Bjarnasyni og markvörðinn magnaða Gísla Felix Bjarnason.

FH, sem vann þrefalt þetta ár undir stjórn Kristjáns Arasonar, vann rimmuna í fjórum leikjum og lyfti Íslandsmeistaratitilinum á Selfossi. Þá, eins og nú, var Selfoss ekki með heimaleikjaréttinn.

Selfoss hefur dvalið stóran hluta þessarar aldar í næst efstu deild en er nú komið með gríðarlega spennandi lið sem hefur hrifið marga. Ungstirnin og landsliðsmennirnir Elvar Örn Jónsson og Haukur Þrastarson eru í miklu uppáhaldi hjá handboltaáhugamönnum enda framtíðarmenn Íslands.

Sókn gegn vörn

Glugginn gæti verið að lokast ansi hratt á Selfyssinga sem missa Patrek Jóhannesson og Elvar Örn til Skjern eftir tímabilið á meðan að Haukar, til dæmis, eru strax byrjaðir að leggja drög að næsta tímabili með því að fá landsliðsmanninn fyrrverandi Vigni Svavarsson heim.

Haukar munu vafalítið halda áfram að vera við toppinn í íslenskum handbolta en næstu tvær vikurnar fá þegnarnir á Selfossi kjörið tækifæri til að gera uppreisn gegn höfðingjum handboltakonungríkisins.

Helsta tölfræði liðanna í úrslitakeppninni:

Mörk skoruð:

Haukar: 29,5

Selfoss: 30,4

Mörk fengin á sig:

Haukar: 27,6

Selfoss: 29

Hlutfallsmarkvarsla:

Haukar: 34,9

Selfoss: 25,6

Stoðsendingar:

Haukar: 10,9

Selfoss: 9,4

Löglegar stöðvanir:

Haukar: 19

Selfoss: 25,4

Tvær mínútur:

Haukar: 4,1

Selfoss: 3,8