Fyrsta tapið í keppnisleik á heimavelli í 13 ár

Tapið fyrir Norður-Makedóníu, 33-34, í Laugardalshöllinni í undankeppni EM 2020 í handbolta í gær var fyrsta tap karlalandsliðsins í keppnisleik á heimavelli í 13 ár, eða síðan það tapaði fyrir Svíþjóð á þjóðhátíðardaginn 2006.

Fyrir leikinn í gær var Ísland búið að leika 22 keppnisleiki í Laugardalshöllinni í röð án þess að tapa, auk eins leiks sem fór fram á Ásvöllum (38-24 sigur á Eistlandi 2009). Tuttuguogeinn leikur vannst og tveir enduðu með jafntefli. Ísland var búið að vinna níu keppnisleiki á heimavelli í röð áður en að leiknum í gær kom. 

Ísland tapaði fyrir Svíþjóð, 25-26, í seinni leik liðanna í umspili um sæti á HM 2007 á 17. júní 2006. Tapið kom ekki að sök því Íslendingar unnu fyrri leikinn ytra, 32-28, og sennilega hefur aldrei verið fagnað jafn mikið og innilega eftir tapleik í Höllinni og á þjóðhátíðardaginn fyrir 13 árum.

Síðan tóku við 22 keppnisleikir án taps í Laugardalshöllinni auk eins leiks á Ásvöllum. Ísland var taplaust í keppnisleikjum í Laugardalshöllinni í 4681 daga, eða næstum því 154 mánuði. Á þessum tíma stýrðu fjórir þjálfarar íslenska liðinu; Guðmundur Guðmundsson (tvisvar), Alfreð Gíslason, Aron Kristjánsson og Geir Sveinsson.

Alfreð var þjálfari íslenska liðsins þegar það tapaði fyrir Svíþjóð 2006. Guðjón Valur Sigurðsson skoraði fjögur mörk í leiknum en hann er sá eini sem er enn í íslenska liðinu frá 2006.

Aron Pálmarsson átti stórkostlegan leik gegn Makedóníu í gær og skoraði tólf mörk. Þetta var hans fyrsta tap í keppnisleik á heimavelli á landsliðsferlinum. Hann lék sinn fyrsta landsleik þegar Ísland vann Belgíu, 40-21, í undankeppni EM 29. október 2008. Aron skoraði tvö mörk í leiknum.

Íslenska liðið hefur ekki lagt það í vana sinn að tapa í Laugardalshöllinni á undanförnum árum, hvort sem er um að ræða vináttu- eða keppnisleiki. Áður en að leiknum í gær kom var síðasta tap Íslands í Höllinni fyrir Þýskalandi, 24-31, í vináttulandsleik 4. janúar 2015.

Íslendingar fá tækifæri til að hefna ófaranna í Höllinni í gær þegar þeir mæta Norður-Makedóníumönnum í Skopje á sunnudaginn kemur. Þrátt fyrir tapið í gær er Ísland enn á toppi riðils 3 og fái liðið stig gegn Norður-Makedóníu á sunnudaginn fer íslenska liðið langt með því að tryggja sér sigur í riðlinum.

Keppnisleikir í Laugardalshöllinni:

2019

Ísland 33-34 Norður-Makedónía (undankeppni EM 2020)

2018

Ísland 35-21 Grikkland (undankeppni EM 2020)

Ísland 34-21 Litháen (umspil fyrir HM 2019)



2017

Ísland 34-26 Úkraína (undankeppni EM 2018)

Ísland 30-29 Makedónía (undankeppni EM 2018)



2016

Ísland 25-24 Tékkland (undankeppni EM 2018)

Ísland 26-23 Portúgal (umspil fyrir HM 2017)



2015

Ísland 34-22 Svartfjallaland (undankeppni EM 2016)

Ísland 38-22 Serbía (undankeppni EM 2016)



2014

Ísland 36-19 Ísrael (undankeppni EM 2016)

Ísland 29-29 Bosnía (umspil fyrir HM 2015)



2013

Ísland 37-27 Rúmenía (undankeppni EM 2014)

Ísland 35-34 Slóvenía (undankeppni EM 2014)



2012

Ísland 36-28 Hvíta-Rússland (undankeppni EM 2014)

Ísland 41-27 Holland (umspil fyrir HM 2013)



2011

Ísland 44-29 Austurríki (undankeppni EM 2012)

Ísland 36-31 Þýskaland (undankeppni EM 2012)



2010

Ísland 28-26 Lettland (undankeppni EM 2012)



2009

Ísland 34-26 Makedónía (undankeppni EM 2010)

Ísland 34-34 Noregur (undankeppni EM 2010)



2008

Ísland 40-21 Belgía (undankeppni EM 2010)

Ísland 30-24 Makedónía (umspil fyrir HM 2009)



2007

Ísland 42-40 Serbía (umspil fyrir EM 2008)



2006

Ísland 25-26 Svíþjóð (umspil fyrir HM 2007)