Einari ekki refsað fyrir Spaugstofuummælin

Aganefnd HSÍ sá ekki ástæðu til að refsa Einari Jónssyni, þjálfara Gróttu, fyrir ummæli sem hann lét falla eftir leik Seltirninga gegn Stjörnumönnum í þarsíðustu umferð Olís-deildar karla. Stjarnan vann leikinn 30-27.

Í samtali við Vísi gagnrýndi Einar dómara leiksins nokkuð harðlega. Meðal ummæla hans voru: „Ég veit að við erum nú ekki besta liðið á landinu en standardinn á dómgæslunni er náttúrulega fyrir neðan allar hellur. Það er ekki hægt að bjóða upp á þetta sko [...] Ég sem hélt að Spaugstofan væri hætt sko en maður veltir því bara fyrir sér á köflum hvort þetta sé falin myndavél. Þetta er ekki boðlegt og ég vill ekki segja að þetta halli eitthvað endilega á okkur.“

Ummæli Einars voru tekin fyrir á fundi aganefndar í dag og komst hún að þeirri niðurstöðu að ummælin væru ekki refsiverð. Í úrskurði aganefndar segir samt að Einar hefði mátt temja sér varfærnislegra orðfæri en innan tjáningarfrelsis þjálfara rúmist réttur þeirra til að segja sína skoðun á dómgæslu.

„Samkvæmt 18. gr. reglugerðar HSÍ um agamál er stjórn eða framkvæmdastjóra HSÍ heimilt að vísa til aganefndar atvikum sem skaðað geta ímynd handknattleiksíþróttarinnar. Um getur verið að ræða hvers kyns ósæmilega framkomu innan eða utan leiks eða á annan hátt opinberlega. Aganefnd hefur farið yfir umrædd ummæli. Aganefnd tekur undir að þjálfarinn hefði í viðtalinu mátt temja sér varfærnislegra orðfæri. Það er hins vegar mat nefndarinnar að gera verður í þessum efnum, greinarmun á, annars vegar ummælum sem fela í sér almenna gagnrýni á störf dómara eða framkvæmd leikja, og hins vegar alvarlegum aðdróttunum í garð einstakra aðila, ásakanir um óheiðarleika eða annað slíkt. Telur nefndin að umrædd ummæli feli fyrst og fremst í sér gagnrýni þjálfarans sem byggja á upplifun hans og hann getur að einhverju leyti fært rök fyrir. Innan tjáningarfrelsis þjálfarans rúmast, að mati nefndarinnar, réttur hans til að segja, innan skynsamlegra marka, skoðun sína á frammistöðu dómara og skipulagi HSÍ. Með vísan til alls framangreinds er niðurstaða nefndarinnar að ummælin feli ekki í sér ósæmilega framkomu sem skaðað getur ímynd handknattleiksíþróttarinnar. Að mati nefndarinnar er ekki tilefni til að láta aðila sæta viðurlögum í máli þessu.“

Grótta féll úr Olís-deildinni eftir tap fyrir ÍR á laugardaginn. Einar hættir sem þjálfari liðsins eftir tímabilið.

Daníel Freyr Andrésson, markvörður Vals, fékk ekki bann vegna rauða spjaldsins sem hann fékk í leik liðsins gegn FH á sunnudaginn.

Dómurinn vakti talsverða athygli og skiptar skoðanir voru á honum. Atvikið má sjá hér fyrir neðan.