Solskjær: Okkur vantar 15 stig í viðbót

Ole Gunnar Solskjær, stjóri Man. Utd, var eðlilega svekktur að hafa tapað gegn Wolves í gær og sagði að sínir menn hefðu átt að vinna leikinn.

Þetta tap var áfall fyrir United sem er í harðri baráttu um að komast í Meistaradeildina að ári. Solskjær segir að sitt lið þurfi 15 stig í síðustu sex leikjum sínum til þess að komast í Meistaradeildina að ári.

„Við hefðum átt að vera komnir í 3-0 áður en þeir gerðu nokkuð. Við klúðruðum þessu alveg sjálfir. Þetta var fínasta frammistaða þar til þeir skoruðu seinna markið sitt,“ sagði Solskjær sem veit að baráttan verður erfið á lokasprettinum.

„Ég sagði að við þyrftum að fá 18 stig úr síðustu átta leikjunum. Það þýðir að okkur vantar núna 15 úr síðustu sex. Það er því ekki hægt að tapa fleiri leikjum. Við megum ekki misstíga okkur aftur.“