Bein útsending: Kvöldfréttir Stöðvar 2

Undirritun kjarasamninga um þrjátíu stéttarfélaga og Samtaka atvinnulífsins hefur dregist fram eftir öllum degi. Vonir standa þó til að hægt verði að undirrita samningana í kvöld. Umtalsverðar breytingar verða gerðar á lögum um verðtryggingu lána og gripið til fjölda annarra aðgerða að hálfu stjórnvalda í tengslum við samningana. Reiknað var með því að undirritun hæfist um klukkan þrjú í húsakynnum Ríkissáttasemjara en þónokkur töf hefur orðið á því og enn liggur ekki ljóst fyrir hvenær það verður. Eftir að samningar hafa verið undirritaðir hyggjast stjórnvöld kynna svokallaðan lífskjarasamning sem til stóð að yrði kynntur í gærkvöldi, en ekki varð af.

Fjallað verður nánar um stöðu mála við gerð kjarasamninga í kvöldfréttum Stöðvar 2 klukkan 18:30 á eftir.

Skúli Mogensen, stofnandi WOW air, segist hafa fjárfest fyrir um fjóra milljarða króna í félaginu frá stofnun. Hann segir ljóst að hann muni fá lítið sem ekkert af því til baka. Þetta kemur fram í aðsendri grein sem Skúli sendi fjölmiðlum skömmu fyrir klukkan fimm í dag.

Þá segjum við frá nýjustu fréttum af Brexit, en mikil reiði er innan breska Íhaldsflokksins eftir að Theresa May, forsætisráðherra, ákvað að boða leiðtoga stjórnarandstöðunnar til viðræðna um Brexit. Gagnrýnendur hennar segja hættu á því að flokkurinn klofni. Við fjöllum einnig um málefni kvenna með fötlun og ræðum við sérfræðing í jafnréttismálum fatlaðra og kvenna sem segir mikilvægt að ríkið hugi vel að þessum tveimur hópum þegar kemur að lagasetningu.