Lágspennufall

Us

Leikstjórn: Jordan Peele

Aðalhlutverk: Lupita Nyong’o, Winston Duke , Shahadi Wright Joseph, Evan Alex



Hálf heimsbyggðin og jafnvel gott betur virðist ekki geta haldið vatni yfir hryllingsmyndinni Us, sem má teljast undarlegt þar sem slík er hún heldur bragðdauf og lítt spennandi.

Huggulegt sumarleyfi ósköp venjulegrar kjarnafjölskyldu snýst snarlega upp í martröð þegar illir tvífarar fjölskyldumeðlimanna banka upp á með illt eitt í huga.

Jordan Peele grautar hér saman mörgum helstu yrkisefnum hryllingsmyndanna, sundrung kjarnafjölskyldunnar, tvífaraminninu og ýmsu öðru og vísar, oft skemmtilega, í klassískan hrylling.

Myndin fer feikivel af stað og ekki verður af leikstjóranum tekið að hann nær oft upp býsna drungalegri stemningu með tónlist, útpældu myndmáli og fimleikum með tökuvélina.

Stóri gallinn er bara hversu losaralegt þetta allt saman er og grunnsagan er í raun veik og að manni læðist sá grunur að öll athyglin og hrifningin séu í raun eftirskjálftar frá síðustu mynd hans, þeirri stórgóðu Get Out.

Síðan eru vitaskuld ótal túlkunarmöguleikar í boði og hægt að lesa alls konar hyldjúpa samfélagsgagnrýni út úr þessu. Þá vitaskuld margt sem er ákaflega brýnt í Bandaríkjum Trumps. Þessar pælingar enda því miður líka úti í móa vegna ómarkviss hálfkáks.

Us er full af frábæru hráefni en úrvinnslan er ekki betri en svo að hún verður fljótt langdregin og það sem verra er, leiðinleg.

Niðurstaða: Spennusnauð og hryllingslaus hryllingsmynd sem þvælist stefnulaust í ýmsar áhugaverðar áttir og verður ekki, þrátt fyrir góða viðleitni, neitt sérstaklega hvöss samfélagsádeila.