Engin trygging fyrir styttingu vinnutímans fyrir almennt verkafólk

Mikil munur er á túlkun ASÍ og Eflingar á ákvæðum um styttingu vinnuvikunnar í nýjum kjarasamningum. Framkvæmdastjóri Eflingar segir þá ekki fela í sér neinar tryggingar fyrir styttingu vinnutíma hjá almennu verkafólki.

Í tilkynningu sem Alþýðusamband Íslands sendi frá sér í gær kemur fram að meðal helstu atriða í nýjum kjarasamningi verslunar-, skrifstofu-, og verkafólks sé aukið vinnustaðalýðræði með möguleika á verulegri styttingu vinnutímans sem ASÍ segir mestu breytingar í hálfa öld.

Í tilkynningu frá Eflingu í dag er áréttað að vegna framsetningar á inntaki kjarasamnings aðildarfélaga Starfsgreinasambandsins við Samtök atvinnulífsins varðandi vinnutímabreytingar feli hann ekki í sér neinar tryggingar fyrir styttingu vinnutímans hjá almennu verkafólki. Þá segir Efling að þær styttingar vinnutímans sem koma fram í kjarasamningnum séu aðeins lítilsháttar breytingar á skilyrtum heimildum sem þegar voru í kjarasamningi og munu ekki hafa áhrif á nema á einstaka vinnustöðum þar sem samkomulag um slíkt næst.

Drífa Snædal, forseti Alþýðusambandsins, segir þennan hluta fyrirtækjaþátt samningsins sem vissulega sé til staðar í núverandi samningi.

„Það er í rauninni verið að virkja hann miklu meira núna í þeim tilgangi að reyna að stytta vinnuvikuna. Þetta er í valdi hvers vinnustaðar fyrir sig en útfærslan verður sú að vinnandi fólk leggur eitthvað af mörkum af kaffitímanum og atvinnurekendur leggja eitthvað af mörkum með hreinni styttingu,“ segir Drífa Snædal, forseti ASÍ.

Tillögurnar sem kynnar voru í gær eru fjórar að frátöldu óbreyttu vinnufyrirkomulagi. Hægt verður að semja um styttri vinnudag, styttri vinnuviku, frí annan hvern föstudag og svo í fjórða lagi styttri vinnudag þar sem vélar stjórna hraða.

Verður ekki erfitt að fylgja þessu eftir?

„Það verður örugglega erfitt. Það er margt í þessum samningum sem verður áskorun að fylgja eftir, segir Drífa.

Viðar Þorsteinsson, framkvæmdastjóri Eflingar, segir samninginn ásættanlega málamiðlun á kröfum stéttarfélagsins en að lögð verði áhersla á það að kynna samninginn fyrir félagsmönnum nákvæmlega eins og hann er.

„Við höfum ekki getað séð að í þessum samning sé að finna neina tryggingu fyrir styttingu vinnutímans fyrir almennt verkafólk og kannski má segja að umfjöllun gærkvöldsins hafi svona mögulega boðið upp á einhvern misskilning varðandi það atriði og við vildum bara tryggja að félagsmenn okkar væru rétt upplýstir að hverju þeir eru að fara ganga að því það eru þeir sem að munu taka þennan samning fyrir í atkvæðagreiðslu,“ segir Viðar.

Framkvæmdastjóri Starfsgreinasambandsins segir kjarasamninga Eflingar öðruvísi en annarra sem skrifað var undir við í gær.

„Það stafar að því að fyrirkomulag lögbundinna neysluhléa hefur verið örðuvísi hjá verslunarmönnum í þeirra samningum svoleiðis að væntanleg stytting vinnuvikunnar kemur til framkvæmda með öðrum hætti hjá þeim,“ segir Flosi Eiríksson, framkvæmdastjóri Starfsgreinasambandsins.

Hvenær geta starfsmenn og vinnustaðir farið að ráðast í þessa vinnutilhögun?

Fyrst þurfum við nú að bera samningin sem skrifað var undir í gær undir atkvæði okkar félagsmanna um allt land og undirbúningur hófst að því í morgun þegar að kjörstjórn Starfsgreinasambandsins kom saman og  ef að það gengur eftir að og samningurinn verður samþykktur, eigum við að segja í lok þessa mánaðar að þá geta menn farið að huga að þessu,“ segir Flosi.