Þórarinn Ingi: Lét orð falla sem eiga ekki heima á fótboltavelli

Þórarinn Ingi Valdimarsson sendi frá sér tilkynningu á Twitter í dag vegna rauðs spjalds sem hann fékk í leik Stjörnunnar og Leikins R. í Lengjubikarnum um helgina.

Fótbolti.net greindi frá því fyrr í dag að Þórarinn hefði fengið beint rautt spjald í leiknum vegna niðrandi ummæla um geðsjúkdóma í garð Ingólfs Sigurðssonar. Þorvaldur Árnason, dómari leiksins, heyrði ummælin og rak Þórarin umsvifalaust af leikvelli.

„Í leik Stjörnunnar og Leiknis missti ég stjórn á skapi mínu og lét orð falla sem eiga ekki heima á fótboltavelli. Orð sem eru mér ekki sæmandi. Ég fékk verðskuldað rautt spjald. Strax eftir leik talaði ég við við viðkomandi aðila og baðst afsökunar á því. Fyrir mér lauk málinu þar og skildum við sáttir,“ sagði Þórarinn Ingi í tilkynningu sinni.

Umræddum leik lauk með 3-3 jafntefli en þetta var síðasti leikur beggja liða í Lengjubikarnum þetta árið.

pic.twitter.com/debadshRLv

— Thorarinn Ingi V (@thorarinnV) March 18, 2019