Miðflokkurinn segir alla aðra flokka hampa vogunarsjóðum með frumvarpi

Formaður Miðflokksins segir stjórnvöld vera að gefa eftir gagnvart erlendum vogunarsjóðum með frumvarpi fjármálaráðherra sem þingmenn flokksins hafa nú rætt á Alþingi í tæpan sólarhring. Formaður efnahags- og viðskiptanefndar segir þessar fullyrðingar alrangar.

Önnur umræða um frumvarp fjármálaráðherra um meðferð krónueigna sem enn eru í höftum hófst á Alþingi í gær og stóð yfir í rúmar fjórtán klukkustundir.

Níu þingmenn Miðflokksins ræddu frumvarp fjármálaráðherra í um þrjú hundruð ræðum frá klukkan þrjú í gærdag til klukkan að verða hálf sex í morgun. Þegar þingfundur hófst nú klukkan þrjú í dag sá ekki fyrir endann á ræðuhöldunum. 

Hverju eruð þið að reyna að fá fram með þessum miklu ræðuhöldum?

„Við viljum til dæmis fá svör við því hvers vegna ríkisstjórn sem treystir sér ekki til að koma betur til móts við vinnumarkaðinn, treystir sér ekki til að koma til móts við eldri borgara, skilur heilu atvinnugreinarnar eftir í óvissu eins og landbúnaðinn forgangsraðar með þessum hætti. Er tilbúin til að gefa eftir sem nemur jafnvel tugum milljarða til vogunarsjóða. Þeirra vogunarsjóða sem hafa neitað að taka þátt í efnahagslegu endurreisninni á Íslandi,” segir Sigmundur Davíð Gunnlaugsson formaður Miðflokksins.

Smári McCarthy þingmaður Pírata er einn örfárra þingmanna annarra flokka sem farið hefur í andsvör í umræðunni. Hann segir hörku Miðflokksins nú undarlega í ljósi þess að þeir hafi ekki á nokkurn hátt tekið þátt í samtali um málið á Alþingi þar til nú þegar nefndarvinnu sé lokið.

„Þetta er auðvitað sóun á tíma Alþingis. Þetta er sóun á peningum samfélagsins. Það er ekki alveg ljóst hversu miklu tapi varasjóður Seðlabankans verður fyrir fyrir út af þessu uppátæki þeirra,” segir Smári.

Allir flokkar á þingi nema Miðflokkurinn skrifa upp á nefndarálit efnahags- og viðskiptanefndar um málið. En frumvarpinu er ætlað að skapa forsendur fyrir því að erlendir fjárfestar sem hafa átt krónueignir á Íslandi árum saman, sem að hluta til eru að losna úr höftum þessa dagana, geti fjárfest með þeim fjármunum á ný hér á landi í stað þess að skipta þeim í gjaldeyri og hverfa með fjármagnið úr landi.

Sigmundur Davíð telur ríkisstjórnina hins vegar hafa horfið frá markmiðum um losun fjármagshafta sem sett voru í tíð ríkisstjórnar hans.

„Það var lagt upp með plan árið 2015 sem gekk út á að þeir sem væru til í að spila með fengju bestu kjörin en hinum yrði í rauninni refsað. Þessu hefur svo verið snúið við og þeir sem ekki hafa verið tilbúnir að leggja sitt að mörkum eru núna verðlaunaðir, segir formaður Miðflokksins. 

Óli Björn Kárason formaður efnahags- og viðskiptanefndar segir þetta rangt. Íslensk stjórnvöld hafi frá því Sigmundur var forsætisráðherra stefnt að því að afnema öll höft á fjármagnshreyfingum þegar skilyrði væru til þess.

„Það er það sem við erum að gera. Þetta er eitt af lokaskrefunum. Við erum ekki búin að öllu leyti. En við erum að stíga mjög stórt mikilvægt skref í þá átt. Og enginn ætti að fagna meira en Sigmundur Davíð Gunnlaugsson að þessum áfanga sé náð,” segir Óli Björn Kárason.