Neymar fór grátandi af velli

Brasilíumaðurinn Neymar, leikmaður PSG, meiddist í bikarleik í gær og fór grátandi af velli. Honum var sagt að hætta þessu væli eftir leik.

PSG vann leikinn gegn Strabourg, 2-0, og stælarnir í Neymar inn á vellinum fóru í taugar andstæðinganna. Það var brotið á honum í þrígang á nokkrum sekúndum og þá meiddist hann.

„Það er hans leikstíll að vera með þessa stæla og það þýðir svo ekkert að vera með einhvern væl þegar það er sparkað í þig,“ sagði Anthony Concalves, leikmaður Strasbourg.

Þjálfari PSG, Thomas Tuchel, var allt annað en sáttur við þessi ummæli og að leikmenn Strasbourg hefðu sagt að Neymar ögraði þeim.

„Það var brotið þrisvar á honum en dómarinn gerði ekkert. Hann hefur áhyggjur af þessu enda sami fótur og hann meiddist á fyrir ári síðan,“ sagði Tuchel en það var í febrúar í fyrra sem hann meiddist og spilaði ekki meir. Hann rétt náði svo HM.