Torfi á láni til KA

Torfi Tímoteus Gunnarsson er genginn í raðir KA á eins árs lánssamningi frá Fjölni og mun því spila áfram í Pepsi-deildinni á næstu leiktíð.

Torfi sem er tvítugur varnarmaður sem er uppalinn í Fjölni og var í liði Fjölnis sem féll úr Pepsi-deildinni á síðustu leiktíð.

Hann hefur verið í yngri landsliðum Íslands en hann hefur leikið samtals 32 leiki. Hann hefur skorað fimm mörk í landsliðsbúningnum en hann hefur samtals spilað 34 leiki í efstu deild.

„Það er klárt mál að koma Torfa til KA mun styrkja liðið og viljum við bjóða hann velkominn norður og ætlumst við mikils af honum í sumar,“ sagði í tilkynningu á vef KA.

Óli Stefán Flóventsson tók við KA í vetur og hefur meðal annars nælt sér í Guðjón Pétur Lýðsson og Andra Fannar Stefánsson frá Val.

Torfi Tímoteus skrifaði í dag undir eins árs lánssamning við KA en hann kemur til liðsins frá Fjölni. Þetta eru miklar gleðifregnir en Torfi er öflugur varnarmaður sem hefur leikið fyrir öll yngri landslið Íslands. Velkominn í KA! #LifiFyrirKA https://t.co/O8Tq6YbGQO pic.twitter.com/LcLYVAqoda

— KA (@KAakureyri) January 25, 2019