Fjárhagsaðstoð hækkar um sex prósent um áramótin

Borgarstjórn Reykjavíkur hefur samþykkt að hækka grunnfjárhæð framfærslustyrks velferðarsviðs borgarinnar um sex prósent frá næstu áramótum.

Þannig hækkar grunnfjárhæð framfærslustyrks fyrri einstakling úr 189.875 krónum á mánuði í 201.268 krónur á mánuði. Hjá hjónum og sambúðarfólki fer upphæðin úr 284.813 krónum í 301.902 krónur á mánuði.

Áætlaður viðbótarkostnaður velferðarsviðs Reykjavíkurborgar vegna hækkunar fjárhagsaðstoðar er tæplega 49 milljónir króna á árinu 2019.

Samþykkt var að hækka áætlun fjárhagsaðstoðar um rúmlega 94 milljónir króna á næsta ári. Í heild greiðir Reykjavíkurborg um 2,2 milljarða króna á næsta ári til fjárhagsaðstoðar.