Mál Ágústar Ólafs kom þingmanni Miðflokksins ekki á óvart

Þorsteinn Sæmundsson þingmaður Miðflokksins segir að yfirlýsing Ágústar Ólafs Ágústssonar hafi ekki komið honum á óvart.

Í gær tilkynnti Ágúst að hann hygðist fara í tveggja mánaða launalaust leyfi vegna framkomu sinnar í garð konu sem hann hitti á bar í byrjun sumars. Í stöðuuppfærslu á Facebook sagði Ágúst að hann hefði hlotið áminningu frá trúnaðarnefnd Samfylkingarinnar fyrir að hafa tvívegis nálgast konu og spurt hana hvort þau ættu að kyssast. Þegar hún neitaði honum um koss lét Ágúst „mjög særandi orð falla um hana“ eins og Ágúst komst sjálfur að orði.

Þorsteinn segir að burtséð frá persónu Ágústar – sem hann þekki sem ágætan mann – þá hafi það ekki komið honum á óvart að mál af svipuðum toga og Klaustursbarsmálið hafi komið fram í framhaldinu. Þetta sagði hann í Vikulokunum á Rás 1 í morgun.

„Ég er þess fullviss að við eigum eftir að sjá fleiri. Ég er alveg viss um það og það gerir okkur enn meira grein fyrir því hvað við eigum mikið verk fyrir höndum að endurvinna traust,“ segir Þorsteinn.

Mál Ágústar Ólafs gríðarlegt áfall fyrir Samfylkinguna 

Guðjón Brjánsson þingmaður Samfylkingarinnar segir að fréttirnar hefðu verið honum gríðarlegt áfall.

„Við höfum gengið í gegnum á undanförnum misserum mikla umræðu um samskipti kynjanna, misrétti og kerfisbundið áreiti, Me too umræðuna sem Samfylkingin var auðvitað leiðandi afl í og lagði mikla áherslu á að við næðum einhverju fram þar og að við létum ekki bara orðin tóm gilda heldur létum verkin tala og sýndum það í rauninni.

Þess vegna eru það auðvitað vonbrigði að við skulum ekki vera komin lengra, sérstaklega við karlarnir, eigum eitthvað dálítið í land.“

Guðjón segir að yfirlýsing Ágústar tala fyrir sig sjálfa en að málið allt sé áfall. Það verði engin fjöður dregin yfir það. „En við, auðvitað, erum miður okkar í okkar flokki. Það er engin spurning.“

Þurfi að ráðast í erfið mál í miðri byltingu

Þórunn Egilsdóttir þingmaður Framsóknarflokksins segir málið hafa komið sér á óvart.

„Hann er minn ágæti sessunautur það hefur farið vel á með okkur og ég las þetta bara þarna eins og allir aðrir, ég vona að Ágústi gangi vel að vinna úr sínum málum og virði hans ákvörðun fullkomlega og styð hann í því og vona að það gangi allt vel hjá honum.“

Hún segir að nú sé bylting í samfélaginu og að í henni felist að taka á ýmsum málum. Það sé ekki alltaf auðvelt. „Þetta er þvert á flokka. Það er engin pólitík í þessu, ekki að því leytinu heldur er þetta mannlegi þátturinn og við þurfum öll að leggja okkar af mörkum.“

Ætlar að taka utan um Ágúst Ólaf

Brynjar Níelsson þingmaður Sjálfstæðisflokksins segir að þau mál sem komið hafa upp að undanförnu séu hörmungar. „Ég nef nú tilhneigingu - sérstaklega á þessum tíma ársins – til að fyrirgefa fólki og vona að hlutirnir batni. Ég mun sennilega bara taka utan um Ágúst Ólaf þegar hann kemur og aðra. Ég held það sé ágætt fyrir okkur en ég er ekki að draga úr ábyrgð þeirra og skömminni.“