Þakplötur fuku á Esjumelum og rúta í hættu í Fnjóskadal

Nóg hefur verið að gera hjá björgunarsveitum í dag en þær hafa hafa sinnt mörgum útköllum vegna veðurs. Hópar voru kallaðir út vegna foks á Esjumelum á þriðja tímanum og þá er veður enn afar slæmt á Norðurlandi.

Davíð Már Bjarnason upplýsingafulltrúi Landsbjargar segir í samtali við Vísi að björgunarsveitir á höfuðborgarsvæðinu og á sunnanverðu landinu hafi aðallega fengist við lokanir á vegum. Nú síðast voru voru hópar kallaðir út þegar þakplötur tóku að fjúka á Esjumelum og var því verkefni lokið um klukkan hálf fjögur.

Helstu verkefni björgunarsveitanna hafa þó að sögn Davíðs verið bundin við Norðurland. Sautján manna rúta var til að mynda hætt komin í Fnjóskadal í dag þar sem farangurskerra hafði farið út af veginum. Björgunarsveitir frá Akureyri og Grenivík komu fólkinu til aðstoðar, losuðu rútuna og fóru með hana til Akureyrar. Þá hefur þurft að aðstoða ökumenn og farþega bíla sem setið hafa fastir vegna erfiðrar færðar.

Samkvæmt upplýsingum á vef Vegagerðarinnar er snjóflóðahætta á nokkrum stöðum á landinu. Lokað er á Siglufjarðarvegi, óvissustig er á Ólafsfjarðarmúli og þá er einnig snjóflóðahætta möguleg seinna í dag í Súðavíkurhlíð.

Enn eru í gildi vegalokanir á eftirtölum stöðum: Á sunnanverðu Snæfellsnesi. Þverárfjalli, Siglufjarðarvegi, Öxnadalsheiði, Víkurskarði, Mývatns- og Mörudalsöræfum, Vopnafjarðarheiði og Hófaskarði.