Tvenna Andra Rúnars tryggði sigur

Andri Rúnar Bjarnason skoraði tvisvar í sigri Helsingborg á Varbergs í lokaumferð sænsku B-deildarinnar í knattspyrnu.

Staðan var 1-1 eftir mörk frá Teddy Bergqvist og Markus Holgersson þegar Bolvíkingurinn skoraði tvisvar á fimm mínútum og tryggði Helsingborg sigurinn.

Helsingborg var búið að tryggja sig upp í efstu deild og fagnar sigri í B-deildinni með 63 stig úr 30 leikjum, fjórum stigum meira en Falkenbergs.

Höskuldur Gunnlaugsson skoraði eitt marka Halmstad sem vann öruggan sigur á Östers. Mark Höskuldar kom strax á 15. mínútu og var fyrsta mark leiksins.

Heimamenn í Östers skoruðu sjálfsmark á 39. mínútu og Pontus Silfver setti tvö mörk í seinni hálfleik til að tryggja öruggan sigur Halmstad.

Halmstad lauk leik í 5. sæti deildarinnar.

Alfons Sampsted og félagar í Landskrona steinlágu fyrir Orgryte 4-0 og enduðu leik í botnsæti deildarinnar og féllu niður í þriðju deild.