Hamilton á ráspól í tímatökunum í Brasilíu

Heimsmeistarinn í Formúlu 1, Lewis Hamilton sigraði í tímatökunum í Brasilíukappakstrinum í dag og verður því á ráspól á morgun.



Hamilton tryggði sér heimsmeistaratitilinn í síðustu keppni sem haldin var í Mexíkó. Þrátt fyrir það er hann ekki hættur og sigraði tímatökurnar í Brasilíu í dag.



Helsti keppinautur Hamilton, Þjóðverjinn Sebastian Vettel hjá Ferrari endaði í öðru sæti í tímatökunum en liðsfélagi Hamilton hjá Mercedes, Valtteri Bottas endaði í þriðja sæti.



Liðakeppnin í Formúlunni er enn í fullum gangi þótt svo einstaklingskeppnin sé ráðin og ætlar Hamilton að gera allt sem í sínu valdi stendur til þess að tryggja Mercedes titilinn.



Ferrari er í öðru sæti á eftir Mercedes en 55 stigum munar á liðunum. Þeir Vettel og Kimi Raikkonen, liðsfélagi hans þurfa því að eiga góða keppni á morgun, en Raikkonen endaði fjórði í tímatökunum í dag.