Stærsta hótel­keðja Bret­lands opnar lág­gjalda­hótel

Ný lággjaldahótelkeðja mun hefja rekstur í upphafi næsta árs á Bretlandseyjum. Um er að ræða nýjasta útspil Whitbread, eiganda hótelkleðjunnar Premier Inn, sem reynir nú að fóta sig eftir að hafa selt kaffihúsarisann Costa Coffee til Coca-Cola fyrr á þessu ári.

Nýju hótelin verða rekin undir nafninu Zip by Premier Inn og verða þau staðsett í útjaðri stórborga og bæja. Nóttin mun kosta frá 19 pundum, um 2900 krónum, en lægsta verð Premier Inn til þessa hefur verið 49 pund. Það er þó ekki aðeins verðið sem er rúmlega helmingi minna heldur herbergin sömuleiðis, en þau eru ekki nema 8,5 fermetrar að stærð.

Alison Brittain, forstjóri Whitbread, segir að nýja hótelkeðjan sé sérhönnuð fyrir þá kynslóð neytenda sem kallar eftir lægra verði á kostnað þæginda. Ljóst er að aðstandendur hótelkeðjunnar hafa horft til lággjaldaflugfélaga í þessum efnum en viðskiptavinum býðst að kaupa ýmsa umframþjónustu, sem ekki er innifalin í grunnverðinu.

Má þar til að mynda nefna þrif, en vilji viðskiptavinir láta þrífa herbergi sín daglega þurfa þeir að greiða fyrir það 5 pund aukalega á dag. Þrátt fyrir að þráðlaust net sé innifalið í grunnverðinu geta gestir hótelanna einnig greitt 5 pund til að fá aðgang að háhraðaneti í 24 klukkustundir.

Þess konar tekjuöflun hefur gefið góða raun í flugheiminum. Þannig var greint frá því í dag að tekjur Ryanair af sölu á umframþjónustu hafi aukist um 27 prósent á milli ára.

Það er þó ekki eini innblásturinn sem eigendur Zip fengu úr fluggeiranum. Herbergi hótelkeðjunnar eru hönnuð af PriestmannaGoode, sem hefur meðal annars séð um að útbúa fyrstu-farrými fyrir flugfélög á borð við Air France, Lufthansa og Swiss Airlines.

Í herbergjunum má finna tvö einbreið rúm sem ýta má saman, 24 tommu sjónvarp og lítið baðherbergi með sturtu. Á hótelunum verður að finna sameiginlegt svæði þar sem kaupa má morgunmat en því er síðan breytt í bar þegar líður á daginn. Þá eru sameiginleg þvottaherbergi á öllum hæðum.

Fyrsta Zip-hótelið mun opna í jaðri Cardiff í upphafi næsta árs en þar verður að finna 138 herbergi. Þá hefur hótelkeðjan útvegað sér lóð í Southampton þar sem til stendur að opna 140 herbergja lággjaldahótel.

Premier Inn er stærsta hótelkeðja Bretlandseyja. Keðjan rekur alls um 800 hótel, en þar af eru nokkur í Þýskalandi og Austurlöndum nær. Whitbread seldi kaffihúsakeðjuna Costa Coffee til Coca-Cola í lok ágúst, við mikinn fögnuð fjárfesta.