Hazard segist vera bestur í heimi

Eden Hazard segist vera besti leikmaður heims en hann þurfi að flytja til Spánar til þess að fá titilinn. Sky Sports greinir frá þessu.

Hazard hefur verið orðaður við félagsskipti til Real Madrid á síðustu vikum og í sumar. Hann á tæp tvö ár eftir af samningi sínum við Chelsea og hefur áður sagt að hann sé ekki viss um hvort hann vilji endurnýja við Lundúnaliðið.

Síðustu tíu ár hefur sigurvegari Ballon d'Or verðlaunanna sem besti leikmaður heims spilað á Spáni.

Aðspurður hvort hann þurfi að fara til Spánar til að fá verðlaunin sagði Hazard: „Það er ástæðan fyrir því að ég vil kannski fara.“

Hann sagðist þó ekki ætla að yfirgefa Chelsea þegar glugginn opnar á ný í janúar.

Hazard hefur farið vel af stað með Chelsea á tímabilinu, skorað 8 mörk í 10 leikjum. Þegar hann var spurður hvort hann væri besti leikmaður heims var svarið einfalt. „Já.“