„Það liggur mikið undir og margt í húfi“

Samtök fyrirtækja í velferðarþjónustu hafa verulegar áhyggjur af boðuðum niðurskurði á fjárframlögum til aðildarfélaga. Að óbreyttu mun niðurskurðurinn bitna á þjónustu að sögn framkvæmdastjóra samtakanna en rammasamningur um hjúkrunar- og dvalarrými rennur út um áramótin. Aðilarfélög SFV eru 45 talsins sem flest eru fyrirtæki sem ekki eru ríkisrekin en starfa við velferðarþjónustu samkvæmt þjónustusamningi við hið opinbera.

„Því miður þá var niðurskurður á árinu 2018 og það er ljóst af fyrirliggjandi fjárlagafrumvarpi að ætlunin er að halda áfram að skera niður á árinu 2019 og alveg aftur árið 2020 og 2021 þannig að það er orðið ansi þungt hljóð í okkar aðildarfélög,“ segir Eybjörg Hauksdóttir, framkvæmdastjóri samtaka fyrirtækja í velferðarþjónustu.

Fulltrúar aðildarfélaga komu saman til fundar í dag til að ræða þá alvarlegu stöðu sem við blasir að mati samtakanna. „Það er náttúrlega verið að auka fjármuni inn í heilbrigðiskerfið og það er verið að auka rekstrarfé hjá sjúkrahúsum og heilbrigðisstofnunum og heilsugæslu en einhverra hluta vegna virðist þessi hluti, þessi þriðji geiri, sitja eftir og eiga að fara í einhvern niðurskurð.“

Aðspurð segir hún þó ekki líklegt að niðurskurðurinn verði til þess að einstaklingar sem þjónustunnar njóti þurfi að greiða hærri gjöld. Eybjörg óttast að erfitt verði að komast að samkomulagi um nýjan rammasamning en gildandi samningur rennur út um áramót. „Maður er voðalega hræddur um það. Þetta er langstærsti samningur sem að Sjúkratryggingar Íslands eru með við þjónustuveitendur í dag þannig að það liggur mikið undir og margt í húfi,“ segir Eybjörg.