Guðmann kominn aftur í FH

Miðvörðurinn stóri og sterki Guðmann Þórisson er genginn aftur í raðir FH frá KA en hann skrifaði undir tveggja ára samning við Hafnafjarðarliðið.

Guðmann er öllum hnútum kunnugur í FH en hann spilaði með liðinu frá 2012 til 2015 og varð Íslandsmeistari tvisvar sinnum.

Hann fór frá FH í KA í Inkasso-deildina en kom með liðinu upp og átti stóran þátt í að halda Akureyrarliðinu í efstu deild eftir tólf ára samfellda dvöl í 1. deildinni.

Guðmann er 31 árs gamall og spilaði aðeins níu leiki í Pepsi-deildinni í sumar og í fyrra vegna meiðsla en þegar hann hefur spilað hefur hann verið einn besti miðvörður deildarinnar.

Búist er við enn frekari breytingum á FH-liðinu sem vantaði miðvörð eftir að Eddi Gomes yfirgaf félagið. Hann var á láni í sumar.

Guðmann Þórisson hefur gert tveggja ára samning við FH sem gildir út keppnistímabilið 2020. Við bjóðum @GudmannTh hjartanlega velkominn aftur í Kaplakrika! #ViðerumFH#fotboltinetpic.twitter.com/GtghCl2j64

— FHingar.net (@fhingar) October 16, 2018