Yfirkjörstjórn framlengdi opnunartíma íbúakosningar í Árborg í gær

Yfirkjörstjórn í Árborg framlengdi opnunartíma kjörstaða um sextíu og fimm mínútur í íbúakosningu í gær. Ekki liggur fyrir hvort niðurstaðan verið kærð, en fundað verður um málið í kvöld. Framkvæmdir við nýjan miðbæ á Selfossi gætu hafist í næsta mánuði að öllu óbreyttu.

Kjörsókn í Árborg í gær var með besta móti en rúmlega helmingur þeirra sem voru á kjörskrá mættu á kjörstað og greiddu atkvæði.

Meirihluti þeirra sem greiddu atkvæði var fylgjandi tillögum bæjarstjórnar um breytingar á aðal- og deiliskipulagi nýs miðbæjar sem Sigtún þróunarfélag mun byggja upp.

Bæjarstjórn efndi til kosninganna í vor eftir að undirskriftasöfnun íbúa sem vildu að skipulagsvaldið um svæðið yrði fært í hendur þeirra. Þá ákváðu bæjaryfirvöld af ef 29% kjörgengra íbúa tæki þátt yrði niðurstaðan bindandi.

Tillögur bæjarstjórnar verða nú sendar Skipulagsstofnun sem auglýsir breytingarnar.

Einn þeirra sem stóð að undirskriftarsöfnuninni vor segir ekki ákveðið hvort niðurstöður íbúakosninganna verði kærðar þrátt fyrir áhöld um lögmæti þeirra og augljós merki um mistök sveitarfélagsins í kynningu.

„Við ætlum að fara og skoða málin, hvernig þetta lítur út en það hefur ekkert verið ákveðið neitt,“ segir Davíð Kristjánsson, íbúi í Árborg en hann ásamt fleirum stóðu að undirskriftarsöfnuninni í vor.

Sex kjördeildir voru í Árborg í kosningunum í gær og hafði áður verið auglýst að kjörstöðum yrði lokað klukkan 18:00. Kjörstjórn ákvað hins vegar að framlengja opnunartímann. Þetta staðfesti Ingimundur Sigurmundsson, formaður yfirkjörstjórnar nú undir kvöld og sagði að stuðst hefði verið við svokallað hálftímareglu í lögum um sveitarstjórnar kosningar. Kjörstaðir lokuðu því ekki fyrr en fimm mínútur yfir sjö. Sextíu og fimm mínútum eftir áður auglýstan tíma.

Davíð segir að fullt efni sé til þess að kæra niðurstöðurnar bæði vegna formgalla og framkvæmda sveitarstjórnar í aðdraganda kosninganna. 

„Svo kom annað mál upp varðandi auglýsingu á kosningunum. Það er líka tilefni til kæru en ég þekki það ekki alveg nógu vel en hitt er alveg ljóst að það var ekki farið eftir lögum og svolítill brussugangur í því,“ segir Davíð.

Davíð segist ekki bjartsýnn á að nýr miðbær eins og Sigtún þróunarfélag hefur kynnt muni rísa en Leó Árnason, framkvæmdastjóri félagsins sagði í hádegisfréttum Bylgjunnar í dag að stefnt sé á að hefa framkvæmdir í næsta mánuði.

Verði kosningarnar kærðar liggur ekki fyrir hvort það eitt og sér myndi fresta framkvæmdum um nýjan miðbæ á Selfossi.