Matti Vill kom inná þegar Rosenborg skaust á toppinn

Matthías Vilhjálmsson hóf leik á varamannabekk Rosenborg þegar liðið heimsótti Ranheim í sautjándu umferð norsku úrvalsdeildarinnar í dag.

Matthías horfði á liðsfélaga sína komast í 0-2 á fyrsta hálftíma leiksins en heimamenn klóruðu í bakkann skömmu fyrir leikhlé. Hálfleikstölur 1-2.

Marius Lundemo kom Rosenborg í 1-3 á 77.mínútu og þremur mínútum síðar var Matthíasi skipt inná. Lokatölur urðu 1-3.

Rosenborg skaut sér þar með upp fyrir Brann en síðarnefnda liðið á þó leik til góða; gegn Start á mánudag.