Einkunnir Íslands: Stjarna Gylfa Þórs skein skærast

Vísir gefur leikmönnum Íslands einkunn fyrir sína frammistöðu í leiknum í kvöld líkt og venjulega.

Einu sinni sem oftar er Gylfi Þór Sigurðsson besti maður íslenska liðsins en það var frábært að sjá hvað hann lítur vel út þó svo hann sé búinn að vera lengi frá vegna meiðsla.

Hálfleikarnir í leiknum voru auðvitað eins og svart og hvítt og fáir áberandi góðir í seinni hálfleik.

Einkunnir Íslands:

Hannes Þór Halldórsson - 7

Reyndi lítið á hann framan af. Gat lítið gert við mörkunum.

Hólmar Örn Eyjólfsson - 6

Í nýrri stöðu. Stóð sína plikt varnarlega vel en gerði lítið fram á við. Þekkti sín takmörk.

Kári Árnason - 7

Traustur lengstum og skoraði fínt mark. Svaf aðeins á verðinum í seinna marki Ganverja.

Ragnar Sigurðsson - 7

Svolítið kærulaus á stundum og tefldi á tæpasta vað. Slapp þó allt fyrir horn.

Ari Freyr Skúlason - 7

Mjög traustur í vörninni og reyndi sitt fram á við. Minnti þjálfarann á að honum er enn treystandi í liðið.

Jóhann Berg Guðmundsson - 7

Virkilega sprækur í fyrri hálfleik og mikill kraftur í honum. Gaf svo eftir líkt og aðrir.

Gylfi Þór Sigurðsson - 9

Gylfi var eins og kóngur í ríki sínu í fyrri hálfleik. Gæðin hreinlega láku af honum og ljóst að hann er miklu meira en til í slaginn fyrir HM.

Emil Hallfreðsson - 6

Þekkir sín takmörk vel á miðjunni og reynir að gera hlutina einfalt. Gerði ein slæm mistök sem gefðu getað kostað mark.

Birkir Bjarnason - 7

Virkilega líflegur framan af, sterkur á öllum sviðum og með góð hlaup í svæði. Virkar í fínu standi fyrir HM.

Björn Bergmann Sigurðarson - 7

Hrikalega duglegur og veður af krafti í alla bolta. Vantar aðeins upp á að gera meira með boltann.

Alfreð Finnbogason - 7

Duglegur frammi og skoraði flott framherjamark. Nákvæmlega það sem hann þurfti á að halda fyrir HM.

Varamenn:

Jón Daði Böðvarsson - (Kom inn á fyrir Alfreð Finnbogason á 65. mínútu) - 6

Djöflaðist eins og honum einum var lagið en vorkunn að koma inn í þennan lélega seinni hálfleik.

Rúrik Gíslason - (Kom inn á fyrir Gylfa Þór Sigurðsson á 67. mínútu) - 6

Hafði úr litlu að moða enda Ísland lítið með boltann.

Sverrir Ingi Ingason - (Kom inn á fyrir Birki Bjarnason á 76. mínútu)

Ólafur Ingi Skúlason - (Kom inn á fyrir Emil Hallfreðsson á 88. mínútu)

Arnór Ingvi Traustason - (Kom inn á fyrir Björn Bergmann Sigurðarson á 90. mínútu)