Stjórn Hörpu lækkar laun forstjórans og leiðréttir kjör þjónustufulltrúa

Þjónustufulltrúar í tónlistarhúsinu Hörpu fá greitt tímakaup í samræmi við samninga sem gerðir voru í fyrra og laun forstjórans verða lækkuð í samræmi við úrskurð kjararáðs. Þetta var samþykkt á fundi stjórnar Hörpu í dag. Með þessu telur stjórnin sig koma til móts við gagnrýni á kjör starfsfólks í Hörpu.

Í tilkynningu frá stjórn Hörpu kemur fram að forstjóri hafi kynnt ákvörðun sína um að greiða þjónustufulltrúum tímakaup sem taki í meginatriðum mið af þeim samningum sem voru í gildi á síðasta ári.

„Þannig er komið til móts við gagnrýni meðal þeirra um kjarabreytingar í tengslum við rekstrarhagræðingu í Hörpu. Breytingin tekur gildi 1. júní n.k. og verður tímakaup þá 26,1% yfir taxta stéttarfélags eða að meðaltali 2.935 kr á klst. í eftirvinnu en 85% vinnustunda þjónustufulltrúa eru á kvöldin og um helgar. Þessar breytingar hafa verið kynntar á fundi með þjónustufulltrúum,“ segir í yfirlýsingunni.

Hópur þjónustufulltrúa í Hörpu sagði upp störfum eftir að í ljós kom að laun Svanhildar Konráðsdóttur forstjóra voru hækkuð í fyrra þegar kjör hans féllu ekki lengur undir úrskurði kjararáðs á sama tíma og þjónustufulltrúunum var gert að taka á sig kjaraskerðingu. Nokkrar deilur sköpuðust um þessar ákvarðanir stjórnenda Hörpu. Verkalýðsfélagið VR hætti til dæmis viðskiptum við tónlistar- og ráðstefnuhúsið í kjölfarið.

Stjórnin samþykkti jafnframt í dag ósk Svanhildar um að laun hennar yrðu lækkuð úr þeirri upphæð sem hún samdi um þegar hún var ráðin þannig að þau verði í samræmi við úrskurð kjararáðs sem var gefinn út eftir að hún var ráðin. Lækkunin tekur gildi um mánaðamótin.

Eins var samþykkt að falla frá 8% hækkun stjórnarlauna sem stjórnin samþykkti á aðalfundi 26. apríl. Laun stjórnarmanna hafa þá verið óbreytt frá árinu 2013.

Stjórnin samþykkti einnig tillögu forstjóra um að utanaðkomandi fagaðili geri markaðslaunagreiningu á kjörum þjónustufulltrúa Hörpu sem starfa í hlutastarfi við viðburði þar sem kjör þeirra verða m.a. borin saman við sambærileg störf annars staðar. Leitað hefur verið til ráðgjafarfyrirtækisins Attentus mannauður og ráðgjöf ehf. um að annast verkið.