HK enn án taps á toppnum

HK er enn ósigrað á toppi Inkassodeildarinnar eftir sigur á Leikni í fimmtu umferð deildarinnar í Kórnum í dag. Haukar sóttu sigur suður með sjó í Njarðvík.

Leikurinn í Kórnum byrjaði eftir óskum heimamanna þegar Kári Pétursson skoraði fimmta mark sitt í jafn mörgum leikjum á 12. mínútu. Gestirnir úr Breiðholtinu jöfnuðu hins vegar stuttu seinna með marki frá Sólon Breka Leifssyni.

Staðan var 1-1 í hálfleik og það stefndi allt í jafntefli þar til Bjarni Gunnarsson tryggði HK sigurinn eftir fyrirgjöf Ásgeirs Marteinssonar á 81. mínútu.

Nokkuð dauft var yfir leik Njarðvíkur og Hauka þar til Helgi Þór Jónsson kom heimamönnum yfir eftir undirbúning Bergþórs Inga Smárasonar á 37. mínútu og 1-0 forysta Njarðvíkur í hálfleik.

Magnús Þór Magnússon, leikmaður Njarðvíkur, skoraði annað markið í seinni hálfleik en það var því miður í vitlaust net og hann jafnaði fyrir gestina úr Hafnarfirði. Það var svo Arnar Aðalgeirsson sem tryggði Haukum sigurinn á 88. mínútu leiksins eftir mistök Magnúsar Þórs í vörninni.

Haukar eru komnir með sjö stig í deildinni líkt og Fram, Víkingur og Þór sem öll leika sína leiki í 5. umferð um helgina.

Upplýsingar um úrslit og markaskorara voru fengnar frá Fótbolta.net.