HK á toppinn │ Leiknir hafði betur í baráttunni um Breiðholt

HK er komið á toppinn í Inkasso-deild karla eftir 3-1 sigur á Þrótti á útivelli í kvöld. Leiknir hafði svo betur í grannaslagnum gegn ÍR, eining 3-1.

Bjarni Gunnarsson kom HK yfir á 19. mínútu í Laugardalnum og í upphafi síðari hálfleiks tvöfaldaði lánsmaðurinn frá Stjörnunni, Kári Pétursson, forystu Kópavogsliðsins.

Á 57. mínútu minnkuðu þó heimamenn muninn. Aron Þórður Albertsson var þar á ferðinni en tveimur mínútum síðar gerði Ásgeir Marteinsson þriðja mark HK og gerði þar með út um leikinn.

HK er á toppnum, að minnsta kosti þangað til á morgun, en liðið er með tíu stig eftir þrjá sigra og eitt jafntefli í fyrstu fjórum leikjunum. Þróttur er með fjögur stig í áttunda sætinu.

Leiknir nældi í sín fyrstu stig er liðið vann 3-1 sigur á ÍR í baráttunni um Breiðholt. Sævar Atli Magnússon, Anton Freyr Ársælsson og Sólon Breki Leifsson komu Leikni í 3-0 áður en Björgvin Pétursson minnkaði muninn fyrir ÍR síðla leiks.

Breiðholtsliðin eru því bæði með þrjú stig eftir fjóra leiki en liðin sitja í níunda og tíunda sæti deildarinnar. Leiknir er sæti ofar vegna betri markahlutfalls.

Úrslit og markaskorarar eru fengin frá urslit.net.