Vinnumat fellt út og 150 þúsund króna eingreiðsla

Launahækkun upp á 4,1% og 150 þúsund króna eingreiðsla er á meðal þess sem nýr kjarasamningur grunnskólakennara og Sambands íslenskra sveitarfélaga felur í sér. Atkvæðagreiðsla um samninginn hefst þann 31. maí.

Sjá nánar hér: Kjarasamningur grunnskólakennara í höfn

Undirritun nýs kjarasamnings við grunnskólakennara féll nokkuð í skuggann af sveitarstjórnarkosningunum en hann var undirritaður í húsakynnum ríkissáttasemjara síðdegis á föstudaginn, þar sem málsaðilar hafa fundað stíft að undanförnu. Dagur B. Eggertsson, borgarstóri upplýsti um samninginn í kappræðuþætti oddvita á Stöð 2.

Kynning fyrir félagsmenn á efnisatriðum nýs samnings er þegar hafin og gert er ráð fyrir að atkvæðagreiðsla um samninginn hefist á fimmtudaginn að sögn Þorgerðar Laufeyjar Diðriksdóttur, formanns Félags grunnskólakennara. Atkvæðagreiðslan fer fram rafrænt og lýkur þann 5. júní.

„Við undirrituðum samning með fyrirvara um samþykki félagsmanna og það var ákveðið að færi í kynningu eftir helgi og við erum farin af stað að kynna samninginn fyrir kennurum,“ segir Þorgerður.

Samkvæmt upplýsingum sem félagsmönnum hafa verið sendar um efni samningsins felur hann meðal annars í sér 150 þúsund króna eingreiðslu þann 1. júlí og 4,1% launahækkun 1. júní. Þá verði vinnumat fellt út og tími til undirbúnings aukinn, launaflokkur bætist við eftir 20 ár í kennslu auk nýs menntunarkafla svo fátt eitt sé nefnt.

„Það er svona ákveðin tilfærsla og breyting sem átti sér stað í þessum samningi sem við ætlum núna að bera undir félagsmenn og heyra hvað þeir segja um það.“

Félag grunnskólakennara hefur verið án samnings síðan í desember á síðasta ári en í mars felldu grunnskólakennarar kjarasamning við Samband íslenskra sveitarfélaga með rúmlega 68 prósentum atkvæða.

Spurð hvort hún sé vongóð um að samningurinn verði samþykktur segir Þorgerður:

„Við skrifuðum undir þennan samning í þeirri von að kennarar gefi því tækifæri að skoða hvað í honum felst.“

Samningurinn sem undirritaður var síðastliðinn föstudag gildir til 30. júní 2019, sé það niðurstaða í atkvæðagreiðslu félagsmanna.