Martinez framlengir við Belga

Roberto Martinez, landsliðsþjálfari Belgíu, er búinn að skrifa undir nýjan samning við Belga um að hann þjálfi landslið þjóðarinnar fram yfir EM 2020.

Martinez tók við belgíska liðinu í ágúst árið 2016 og hefur liðið verið að gera það gott undir hans stjórn. Liðið komst á HM án þess að tapa leik í undankeppninni.

Belgía er í þriðja sæti á heimslistanum og er til mikils ætlast af liðinu á HM í sumar. Þar er liðið í riðli með Englandi, Túnis og Panama.

Þessi 44 ára gamli Spánverji stýrði liði Everton frá 2013 áður en hann tók við belgíska liðinu. Þar á undan var hann með lið Wigan.