42 dagar í HM: Brjálaði markvörðurinn sem skoraði mörk

Þegar heimsbyggðin fékk að sjá kólumbíska markvörðinn Rene Higuita á HM árið 1990 þá datt af henni andlitið. Fólk hafði aldrei séð markvarðarstöðuna spilaða eins og hjá Higuita.

Það má segja að Higuita hafi verið langt á undan sinni samtíð því hann spilaði markvarðarstöðuna eins og „sweeper“. Það gerði enginn annar á þessum tíma en í dag er aftur á móti eftirsótt að vera með markverði sem eru öruggir með boltann á fótunum og koma langt úr markinu ef á þarf að halda.

Higuita var magnaður í fótbolta en skynsemin var aldrei hans besti vinur. Þó svo hann kunni ýmislegt fyrir sér í fræðunum þá fór hann oftar en ekki fram úr sér með skelfilegum afleiðingum.

Skýrasta dæmið um það kom á HM á Ítalíu árið 1990 er hann var að gaufa með boltann á eigin vallarhelmingi gegn Kamerún. Hann reyndi svo að sóla gamalmennið Roger Milla með hörmulegum afleiðingum. Milla stal af honum boltanum og skoraði í tómt markið. Fyrir vikið var HM-ævintýri Kólumbíu á enda. Það mark má sjá eftir 2.50 mínútur á myndbandinu hér að neðan.

Það var út af svona tilþrifum sem Higuita fékk viðurnefnið El Loco eða brjálæðingurinn. Hann þótti spila fótbolta eins og brjálæðingur og hann var svo sannarlega oft á tæpasta vaði.

Það var ekki bara að Higuita spilaði út á miðjum velli sem gerði hann sérstakan. Hann nefnilega tók líka auka- og vítaspyrnur. Var frábær spyrnumaður.

Hann skoraði 41 mark í 380 leikjum á ferlinum. Hann spilaði 68 landsleiki fyrir Kólumbíu og skoraði í þeim leikjum þrjú mörk.

Það sem Higuita verður þó alltaf minnst fyrir er sporðdrekavarslan. Markvarsla sem hann fann upp og beitti fyrst í vináttulandsleik gegn Englandi á Wembley árið 1995.

Algjörlega geggjað. Hann átti eftir að beita þessu bragði oftar á ferlinum en þetta atvik er það sem allir muna eftir hjá kappanum skrautlega.

Utan vallar gekk mikið á hjá Higuita en hann er frá Medellin og var vinur fíkniefnabarónsins Pablo Escobar.  Sá vinskapur leiddi til þess að markvörðurinn var dæmdur til fangelsisvistar árið 1993.

Hann var þá notaður sem milliliður í mannránsmáli sem tengdist Escobar og öðrum fíkniefnabarón, Carlos Molina. Escobar fékk milljónir fyrir að fara með peninga á milli í mannránsmálinu. Það er ólöglegt að hagnast á mannráni og því var Higuita sendur í steininn.

„Ég er bara knattspyrnumaður. Ég veit ekkert um mannránslög,“ sagði Higuita en hann missti af HM 1994 þar sem hann sat í steininum vegna þessa máls.

Er Escobar fór sjálfur í steininn þá fékk hann heimsókn frá Higuita sem vildi þakka fíkniefnabaróninum fyrir að gefa sig fram við lögreglu svo ástandið róaðist í landinu í smá tíma.

Higuita féll á lyfjaprófi seint á árinu 2004 og ári síðar fór hann í lýtaaðgerð til þess að breyta útliti sínu algjörlega. Han gerir nokkurn veginn bara það sem honum dettur í hug að gera.

Markvörðurinn skemmtilegi er 51 árs gamall í dag. Hann lagði skóna upprunalega á hilluna árið 2005 en reif þá niður úr hillunni tveimur árum síðar og spilaði alveg til ársins 2010.