Vignir Rafn hundskammar menningarritstjóra RÚV

Vignir Rafn Valþórsson, leikari og leikstjóri, er afar ósáttur við þá gagnrýni sem boðið var upp á í „Menningunni“ á Ríkissjónvarpinu. En, þar var snubbóttur dómur um Hans Blæ, nýtt íslenskt leikrit eftir Eirík Örn Nordahl sem er sett upp í Tjarnarbíói af leikhópnum Óskabörnum ógæfunnar í leikstjórn Vignis Rafns.

Norðurlandamet í að ryðja út úr sér greiningu

Vignir Rafn ritar harðorðan pistil og birtir í hópi sem reyndar Eiríkur Örn stofnaði á sínum tíma á Facebook og heitir Menningarátökin.

Hann birtir hlekk á umfjöllunina og setur spurningarmerki við það hvernig að umfjölluninni er staðið:

„Hér sitja þrjár manneskjur og á ca þrem mínútum reyna þær að setja norðurlandamet í að ryðja út úr sér einhverri „greiningu“ eða skoðun á listaverki sem tók þrjú ár að fjármagna og búa til. Með þessu hefur RÚV tikkað í boxið og getur slegið um sig og sagst „fjalla um menningu í landinu“,“ segir Vignir Rafn afar ósáttur.

Til lítils að splæsa frímiðum á gagnrýnendur...

Hann bætir því við að auðvitað geti þau í leikhópnum tekið eina og eina setningu sem „sem sérfræðingarnir láta út úr sér og slegið upp sem heilögum sannleik á plakatinu til að selja miða. Annað er ekki að taka úr þessu fyrir okkur (eða áhorfendur).

Ég meina, EINA ástæðan að leikhús landsins taka þátt í því að splæsa frímiðum á gagnrýnendur er:

Vonin að þeir segi eitthvað næs sem við getum selt sjittið okkar með,“

skrifar Vignir gramur og segir að þannig sé það bara.

Leikstjórinn segist ekki vilja setja of mikinn fókus á kostnaðinn við að bjóða gagnrýnendum „en miðinn á Hans Blævi kostar 3.900 sem sinnum sex (tveir miðar á hvern gangrýnenda) er 23.400.“

Vignir Rafn telur þetta langt í frá viðunandi.

Bljúgur Bergsteinn en herskár Helgi

Bergsteinn Sigurðsson, menningarritstjóri Ríkissjónvarpsins, er heldur lúpulegur þegar hann svarar hinum herskáa leikstjóra á þessum sama vettvangi.

„Ég get tekið undir að þetta var of stutt í gær. Aðstæður leyfðu illu heilli ekki lengingu á þættinum í gær. Það hefði auðveldlega verið hægt að ræða Hans Blæ allan tímann og gott betur,“ segir Bergsteinn. Með kveðju.

Félagi hans á Ríkisútvarpinu, Helgi Seljan, er hins vegar ekki eins bljúgur þegar hann leggur orð í belg vegna þessa erindis. Og rís upp stofnuninni og félögum sínum þar til varnar. Slær í brýnu milli Helga og Vignis Rafns.

Viggi come on!

Svo hér sé birt örleikrit, samtal milli fjölmiðlamannsins og leikstjórans, sem finna má á Menningarátökunum:

Helgi Seljan: „Dómarinn er ósanngjarn. Fékk samt frítt inn á leikinn. Og þess vegna vil ég ekki sjá’ann. Viggi come on!“

Vignir Rafn Valþórsson: „Er þetta í alvörunni punkturinn sem þú lest úr pistlinum Helgi?“

Helgi Seljan: „More or less, já.“