Þessir fimm gætu leyst Gylfa af í „tíunni“ á HM ef allt fer á versta veg

Íslenska þjóðin heldur niðri í sér andanum eftir fréttir morgunsins af Gylfa Þór Sigurðssyni, landsliðsmanni í fótbolta, og meiðslunum sem hann varð fyrir í leik á móti Brighton um helgina.

Gylfi haltraði af velli eftir að fá tak í hnéð en hann lá svo og þarfnaðist aðhlynningar. Allt leit betur út þegar að Gylfi stóð á fætur og kláraði leikinn en nú virðist sem að hann sé alvarlega meiddur.

„Menn óttast að Gylfi sé farinn í sumarfrí. Það virðist hafa teygst eitthvað í hnénu og óttast að hann missi af HM. Hann verður alltaf frá í töluverðan tíma,“ sagði Hjörvar Hafliðason, sparkspekingur Stöðvar 2 Sports, í Brennslunni á FM957 í morgun.

Í spilaranum hér að ofan má sjá atvikið þegar að Gylfi meiddist.

Töpuðu síðast þegar Gylfi var ekki með

Eins og allir vita er Gylfi besti og mikilvægasti leikmaður íslenska landsliðsins, en hann var marka- og stoðsendingahæstur í síðustu undankeppni þegar að strákarnir okkar tryggðu sér sæti á HM í fyrsta sinn.

Eins og Vísir fjallaði um í morgun tapaði íslenska liðið eina mótsleiknum sem hann hefur ekki tekið þátt í undanfarin sex ár en það var 4-2 tap gegn Slóveníu í Laugardalnum í júní árið 2012.

Gylfi Þór hefur spilað nánast hverja einustu sekúndu í leikjum sem skipta máli síðan þá og hefur Heimir Hallgrímsson alltaf getað treyst á framlag frá sínum besta manni.

En, hvað gerir Heimir ef Gylfi verður ekki með?

4-4-2 einfaldara

Hausverkurinn er minni ef Heimir heldur sig við 4-4-2 leikkerfið. Birkir Bjarnason, Emil Hallfreðsson og Theodór Elmar Bjarnason hafa allir sýnt að þeir geta spilað við hlið landsliðsfyrirliðans Arons Einars Gunnarssonar á miðjunni. Þá verða Alfreð Finnbogason og Jón Daði Böðvarsson frammi, að öllum líkindum.

Heimir Hallgrímsson hefur, aftur á móti, brotið sig aðeins út úr 4-4-2 kassanum og verið að spila með þriggja manna miðju eins og í sigurleiknum frækna á móti Króatíu í júní í fyrra. Þá var Emil með Aroni á miðjunni og Gylfi fyrir framan þá í „holunni“ eða „tíunni“ fyrir aftan fremsta mann.

Það kæmi engum á óvart ef Heimir vill spila með þéttan pakka í þriggja manna miðju á móti Argentínu og Króatíu á HM og þá þarf Eyjamaðurinn að finna staðgengil Gylfa ef rétt reynist að hann missi af HM.

Vísir veltir hér upp fimm möguleikum á þriggja manna miðju sem miðast við að Emil Hallfreðsson verði áfram við hlið Arons Einars Gunnarssonar fyrir framan varnarlínuna.  Taka þarf fram að Aron Einar og Alfreð Finnbogason eru meiddir þessa dagana en líkurnar á að þeir verði klárir fyrir HM eru yfirgnæfandi.

Birkir mjög líklegur

Birkir Bjarnason hefur leyst af inn á miðjunni í fjarveru Arons Einars og hefur sýnt bæði með íslenska liðinu og Aston Villa að hann er úrvals varnarsinnaður miðjumaður.

Birkir er í grunninn mjög sóknarsinnaður leikmaður sem hefur ávallt spilað framarlega á vellinum, hvort sem um ræðir á kantinum eða hreinlega í fremstu víglínu eins og á sínum yngri árum með Viking í Stavanger.

Eins og allir vita er hann svakalega duglegur, fastur fyrir í návígum og góður fótboltamaður sem kemur sterklega til greina sem fremsti miðjumaður í 4-3-3 ef Gylfi er ekki klár.

Birkir er líka sterkastur í loftinu af þeim sem koma til greina sem er mikill plús miðað við fjöldann af löngum boltum fram úr íslensku vörninni.

Skotógn af Jóa

Jóhann Berg Guðmundsson er að spila sinn besta fótbolta þessi misserin, bæði með Burnley og íslenska landsliðinu.

Heimir hefur áður ætlað að nota Jóhann Berg sem framherja eða fremsta miðjumann en það var í frægum leik gegn Tyrklandi haustið 2014. Jóhann meiddist fyrir leikinn sem opnaði tækifæri fyrir Jón Daða Böðvarsson. Jón Daði nýtti það ágætlega.

Jóhann er afskaplega vel spilandi leikmaður og sá leikmaður sem er hvað næst Gylfa þegar kemur að skotógn fyrir utan teiginn. Jóhann er frábær skotmaður og „á inni“ eina eða tvær klessur með íslenska landsliðinu.

Það slæma við að fá Jóhann inn á miðjuna er að missa hann af kantinum þar sem hann er langbesti kantmaður liðsins og orðinn lykilmaður í varnarleiknum líka þar sem hann hefur stórbætt sig undanfarin ár.

Alfreð aðeins aftar?

Þó það væri kannski líkara 4-4-2 kerfinu gæti einn möguleikinn fyrir Heimi verið að spila Alfreð Finnbogasyni sem fremsta miðjumanni í tíunni fyrir aftan Jón Daða.

Alfreð er, eins og allir vita, frábær fótboltamaður sem hefur næmt auga fyrir spili og er með góðar sendingar. Þá gæti hann líka nýtt hæfileika sína áfram í markaskorun þó hann spili aðeins aftar og mætt inn á teiginn þegar færin gefast.

Styrkleiki Alfreðs er þó ekki skallaeinvígi og hörð návígi í baráttunni um háa og langa bolta, en þar gæti Jón Daði séð um baráttuna og Alfreð fengið boltann síðan í fæturnar og komið spili af stað.

Aftur, það er vissulega líkara 4-4-2 en það sem gleymist oft með Alfreð er hversu ótrúlega hlaupagetu hann hefur og hversu duglegur hann er þrátt fyrir mýtu um annað.

Rúnar Már í séns?

Þrátt fyrir að hafa verið lengi hluti af íslenska hópnum og hafa farið á EM 2016 er Skagfirðingurinn Rúnar Már S. Sigurjónsson aðeins búinn að spila fimmtán landsleiki enda ansi góðir menn á undan honum í goggunarröðinni.

Rúnar hefur ekki notið sín og ekki nýtt tækifærin nógu vel þegar hann hefur spilað á tveggja manna miðju landsliðsins enda ansi sóknarsinnaður leikmaður. Honum til varnar hefur hann, eins og fleiri, líka fengið fá tækifæri með bestu mönnum landsliðsins. Mest eru þetta vináttuleikir þar sem fleiri utangarðsmenn fá sénsinn.

Með tvo varnarsinnaða miðjumenn fyrir aftan sig myndi Rúnar vafalítið nýtast mun meira þar sem hann getur einbeitt sér meira að sóknarleiknum. Hann er afbragðs sendinga- og skotmaður og er duglegur að skora fyrir félagslið sín.

Rúnar var lánaður til St. Gallen í janúar þar sem hann er á miklum skriði; búinn að skora tvö mörk, er að leggja upp og var valinn í lið vikunnar á dögunum.

Barnabarnabarnið jókerinn?

Albert Guðmundsson er leikmaður sem margir vilja sjá Heimi Hallgrímsson hafa í HM-hópnum enda einn mest spennandi ungi íslenski leikmaðurinn. Hann er, eins og allir vita, barnabarnabarn Alberts Guðmundssonar, fyrsta atvinnumanns Íslands í fótbolta.

Albert spilar mest með Jong PSV, varaliði PSV Eindhoven, í hollensku B-deildinni sem er ekki mjög sterk deild en þar hefur hann samt sem áður spilað frábærlega. Tækifæri hans með aðalliðinu hafa verið af skornum skammti.

Hann er engu að síður frábær fótboltamaður og langbesti leikmaður U21 árs landsliðsins þar sem hann ber af. Hann nýtti einnig tækifæri sitt með landsliðinu á móti Indónesíu á dögunum stórkostlega þar sem að hann skoraði og lagði upp önnur fjögur mörk í tveimur leikjum.

Galinn er auðvitað að hann hefur enga reynslu af stóra sviðinu en líklegt þykir að Heimir velji hann í hópinn fyrir Bandaríkjaverkefnið á föstudaginn og athugi jafnvel í leikjunum á móti Perú og Mexíkó hvort hann sé tilbúinn fyrir stóra sviðið.